Police visibility sa mga simbahan kan Naga mantenido kan NCPO

Nagseguro an Naga City Police Office (NCPO) sa pamamayo ni City Director Col. Gilbert Farinas sa publico orog na si nag-aatendir sa mga ‘‘Simbang Gabi’’ sagcod sa pagsabat kan kapaskohan ngunian na Deciembre 25 sa manlaen-laen na simbahan na igua sindang nakadestino nin miembros kan PNP kabale na sa centro kan ciudad nganing maseguro an pagmantenir sa paz y orden.

Nagwarak nin 230 personahes an NCPO para sa mga ginigibong Misa de Aguinaldo sagcod sa pagsabat kan bagong taon mantenido an saindang kapupulisan na bako lang sa simbahan maging sa commercial area, plaza asin terminal.

An Naga, sarong matuninong na lugar alagad segun sa NCPO mantenido ninda an ‘‘police visibility’’ maging sa mga centro komersiyal mantang katuwang man ninda an Public Safety Office kan City Hall asin mga barangay tanod.

An nagtapos na mga Simbang Gabi heneralmente matuninong si paz orden na pigtutubodan dakulang tabang an mga nakawarak na miembros kan NCPO.

Sa ilegal na droga padagos an saindang higot na kampanya mala ngani minsan sunod-sunod an mga nagkakataralikop.

Hagad lang ninda sa mga residentes sa barangay an cooperasyon nganing madaling madakop an mga envuelto sa ilegal na droga.