Politika: Harayo pa pero harani na
Sarong taon pa lang pakalihis kan eleksyon kan Mayo 9, 2022 may mga remong-remong naman tungkol sa vida politika bako lang digdi sa Bikol kundi pati sa ibang parte kan Pilipinas lalo na sa Kongreso kan nasyon.
Biglaan kan halion komo senior deputy speaker si dating Presidente Gloria Macapagal Arroyo, resulta si GMA nagkalas sa partidong Lakas pati si Vice-President Sara Duterte. Walat si Speaker Ferdinand Martin Romualdez.
Inda kun totoo na an mga pangyayaring ini bunga kan soboot planong e-kudita si Speaker Romualdez na primero hermano (Primo o first cousin ni Presidente Bongbong Marcos). Idto pati nangyari pakatapos na si GMA kaiba an nagkapirang congressmen pagbiyahe abroad sa sarong official business.
Gabos nagkabirigla pati media pero si VP Sara asin GMA nagpahayag pareho kan saindang liputok na leadtad sa Presidente kan Pilipinas.
Kun ano an masurunod na hiro kan mga nanunungdan sa itaas antabayanan niyato.
Siyempre ta maabot na an eleksyon sa barangay asin Sanggunian Kabataan sa bulan na Oktubre dakul pang aktibidades pampolitika sa mga baro-barangay, mga banwaan, ciudad asin provincial ngonyan pa lang.
Digdi sa Bikol dae pa nahihiranan an mga taga-Albay asin Legazpi City huli sa naguin hiro kan Comelec asin desisyon kan
Korte Suprema.
Sa Camarines Sur enot nang nag-sungaw an bareta na si Congresman LRay Villafuerte kan ikaduwang distrito an malaban kontra sa mga Fuentebella sa pagka-deputado kan Partido area.
Garo bakong totoo yan ta mas dakula an posibilidad na si LRay madalagan para gobernador guiraray kan CamSur ta an incumbent na si Luigi iyo an ma-congresman sa ikaduwang distrito. Si Congresman Migs kan Rinconada matinir bilang deputado kan 5th district.
An mahiro na marhay ngonyan iyo an 3rd district na babayan ni Congresman Gabby Bordado na yaon na sa ika-tolong torno.
Si Ernesto Nonoy Magtuto Jr. na first cousin ni Gov. LRay na aki ni Pura Luisa Villafuerte Magtuto, tugang na matua ni depuntong Luis R.Villafuerte iyo daa an malaban kontra maski kiisay, kontra ki ex-VP Leni, kontra ki ex-Mayor John Bongat, kontra ki Tato Mendoza o kun siisay pang patron o patrona kan Partidong Ubos kun Ubos/ Gabos kun Gabos.
May mga estasyon pati asin may mga radio announcers na amay pa nagkakarampanyana para ki Nonoy, may mga pakawat na nin basketball na pig-aapod Magtuto Basketball League.
May mga announcer sa radyo na hayag-hayagan nang nagkakampanya sa aire na dakula an boses para ki Magtuto.
Sa Naga ngani may pito o onse daang barangay captains nagsumpa na ki Magtuto, igwa man nin alkalde sa 3rd district pati si Mayor Bongalonta kan Pili na number 1 na kalaban ni LRay Villafuerte an nagsumpa na ki Nonoy.
Si dating Vice-governor Tato Mendoza nagpahayag kan saiyang amay na suporta ki Magtuto pati daa an Mayor kan Calabanga, Mayor kan Canaman, Mayor kan Bombon gabos na makampi daa ki Magtuto.
Mientras tanto an mga political historians, political analysts asin ordinaryong paraboto nag-aadal na kan political history sa Bikol poon World War II o tiempo Hapon asin si gran engkontrada kan 1994 ninda Jesse Robredo versus Pudit Magtuto for Naga City Mayor kan magbungkaras an kurahaw sa Naga na Ubos kun Ubos/ Gabos kun Gabos.
Political headliners: Mayor Fermin Mabolo kan San Fernando nag-anunciar na namalaban para gobernador kontra ki LRay. Ex-Mayor Gil Basmayor kan Minalabac mabuelta sa munisipyo ta last term na ngonyan ni Mayor Chris Lizardo. Sa Milaor sige na an pabayle kan may mga marhay na kaisipan na masangle ki Mayor Labhas.