Politika sa CamSur
Interesado an kinaban kan dalagan kan politika sa CamSur ini nin huli seguro sa magayon na performance ni Madam Leni Robredo kan naka-aguing eleksyon kan bulan na Mayo.
Antes ki Leni na naguin Vice-Presidente makusog man si kandidatura kadto ni Senador Raul S. Roco para presidente kan Pilipinas, si Roco saka si Robredo pareho taga-Naga, CamSur.
Enot naki-humapot digdi an babaeng political officer kan Japanese Embassy sa Manila.
Apodon nyato siyang Cookie sarong simpleng babaeng Haponesa na bilang political officer huna mo dai nag-aaram ara ero-enosentehon.
Nagdagos sa CWC sa capitolyo, naka-ulay man kan mga miyembros kan Sangguniang Panlalawigan asin mga taga-media arog kan Bomboo Radyo asin Bicolmail.
Limang pag-iriba kan Bicolmail sa pangengenot ni publisher Nilo P. Aureus an inimbitaran niyang makahampang sa Rolando’s Café kan Villa Caceres Hotel.
Enot niyang hinapot: magdalagan pa daw si ex-Vice-President Leni Robredo sa masunod na election presidential? Simbag kan saro sa mga columnist na nagtrabaho sa America na saro sa maigot na seguidores ni Leni an nagsimbag nin naglalagatak na “DAI”.
Dagdag kan columnist na nagtrabaho sa America baka magdalagan para senadora si Leni. Tibaad manggana na.
Hapot kan Haponesa bako daw na gobernadora? Sabi kan grupo dai yan madalagan sa provincia. Nangalas an political officer kan sabihon kan mga taga-media na mayo man talagang iwal an pamilya Robredo kontra sa pamilya Villafuerte.
Inako na ninda an tunay na Dynastiya sa CamSur poon primer distrito na an nangganang congressman kan Mayo gikan sa Hapon na konsiderado nang parte kan Villafuerte Dynasty.
An ikaduwang distrito pigrerepresentar ni Congressman LRay (Luis Villafuerte Jr.) Villafuerte na aki kaidtong depuntong Luis Robredo Villafuerte Sr., pinaka-halawig na nag-serving gobernador kan provincia.
An tercer distrito na sakop an Naga konsideradong Robredo country na an incumbent Congressman si Gabby Bordado.
An Rinconada area, pinaka-dakulang distrito kan provincia pigrerepresentar ngonyan sa kongreso ni Congressman Migz Villafuerte dating gobernador asin an alkalde kan Iriga City naagaw na sa kamot kan mga Alfelor por medyo kan ganador na si Mayor Rex Oliva, fiel na tauhan kan mga Villafuerte.
An dai lang maagaw kan mga Villafuerte iyo an Partido area na pugol kan mga Fuentebella. An mga Fuentebella labing 100 anyos na an dynastiya sa provincia.
Nagngalas pa an babaeng diplomat na an lolohon kan incumbent Governor na si Luigui iyo an appointed Governor kan Japanese Time sa persona ni Mariano Enciso Villafuerte Sr.
Si depuntong Luis aki, si LRay makuapo, pero si Migz asin si Luigi mga makuapo na sa tuhod.
Pighinghingan pa si Cookie kan mga taga-Bicolmail na tibaad magkandidato pang presidente kan Pilipinas si dating Senadora Laila Delima kun siya makaluwas sa kalabuso.
Ngalas na naman an Haponesa ta mayo daa sa isip niya na si Delima pwedeng mag-presidente.
Sabi kan saro sa taga-media malain an mugtak kan Pilipinas orog na sa linya kan ekonomiya sa lindong kan liderato ni PBBM.
Alagad naribong si Cookie ta an mga Bicolmail staffers nagbuburungguan man an opinion, kun minsan pro American, kun minsan anti-American, kun minsan pro-nationalist.
An editorial writer kan Bicolmail, awtor kan librong “Federalism and Development” na si Digong mismo an naglansar kan 2016.
An editorial writer dating regional director kan TESDA sa Bicol, peace and order consultant sa Mindanao, consultant kan International Labor Organization kan United Nation asin nakalibot sa South Pacific sa pagtulod nin mga proyektos asin programa para sa kauswagan.
Prangkang pigsabihan an Haponesa na dakula an posibilidad na magtultol si Marcos Jr. ta babawion kaini an magayon na pangaran kan saiyang ama asin kan pamilya tanganing maibugtak sa tamang lugar kan istorya kan nasyon an saiyang administrasyon kadto pati an pagdeklara nin Martial Law na aprobado ni Uncle Sam.
Saro sa mga hapot: Ano kaya ta pinayaman kan America an Tsina?
Saro pa: Torotohanan daw an crisis sa Russia asin Ukraine? Bako daw na parte lang yan kan negosyo kan mga super power na nadadanyaran iyo an buhay kan kasaraditan?
Kumbinsido an Haponesa sa mga taga-lokal na media sa Naga ta dakul naaraman asin interesado sinda sa isyu sa National Security o seguridad nasyonal kan Pilipinas.
Mapuli si Cookie sa saiyang embahada na an report nagbuburungguan man pero ipapadagos an pagtabang kan Hapon sa Pilipinas por medyo kan JAICA o Japanese International Cooperation Assistance.