POLPOLITIKO SAKA BOBOTANTE

Tigsik ko an panahon ta ngonian

Santaon pa, pirilian na naman

Polpolitiko nagpaparamdam

Nagpopoon na pag-alimpasay!

Tigsik ko man an bobonteng Pinoy

An voto madalion banwiton

Paonan mo sanang gisik na halong

Naduduling, tulos tatakabon!

Tigsik ko man an polpolitikong epal

Mahilig magpapel; sa pansin kulang

Piglalapida an saiyang pangaran

Sa proyektong bako niya man!

Tigsik ko an candidatong mayong kuwarta

Dawa igua pang malanit na porma

Pero kun  mayong  plata, hare na

Aldaw kan pirilian ika nganga!

Tigsik ko an polpolitikong tanggurangan

Sa pirilian matapsok na naman

Ano an siram na nalingawan?

Ta sa trono habo nang magtagbang!

Tigsik ko an polpolitiko saka botante

Oras po na pinagsaro mo ini

Perfect combination an mangyayari

An banwaan iyo an remate!