POON SA ENERO 12, 2025: PNP andam na sa pagwarak nin mga Comelec checkpoint

Andam na an Philippine National Police (PNP) sa pagbugtak nin mga Comelec check point sa mga estratihikong lugar nganing implementar an gun ban poon sa Enero 12, 2025.

Si P/BGen Andre Dizon, regional director kan PNP Bicol nagsabi na igua na sindang coordinasyon sa Comelec sa pamamayo ni Regional Director Maria Juana Valeza mantang igua na sindang directiva sa mga jefe de pulisiya nganing pag-Enero 12, 2025 nakawarak na an mga check point.

Afuera pa kan badil ano man na bitbit na patarum puedeng kumfiscaron asin sangatan nin caso an siisay man na madadakopan kaini, sabi pa kan PNP Bicol.

Naenot kaini poon pa kan Noviembre 18, 2024, an Comelec nagbukas kan saindang aplikasyon para sa gun ban exemptions para sa maabot na eleksyon sa Mayo 2025.

An mga awtoridad siring kan Philippine Army, Philippine National Police asin iba pang miembro kan bureau tutugotan na magbitbit nin badil kun naka-duty asin uniforme.

Sa resolusyon kan Comelec Number 10741 nagtutubod an ahencia magsusunod digdi an mga awtoridad asin force multipliers sa mandato sa pagconducir nin checkpoint.

Pig-engganyar kan Bicol PNP sa mga gun owner na kun nagpaso na an licensiya kan saindang badil dapat isuko na sa pulis nganing dai sinda hagopon nin caso mantang iguang listahan an PNP kan mga nagpalicensiyang armas.

Sa maabot na Febrero 11, 2025 iyo an pagsikad kan campaign period sa mga candidatong senador kabale na an party list asin sa Marso 28, 2025 iyo man an pagpoon kan campaign period sa mga candidato lokal kabale an miembro kan Camara-Baja.

SURPRISANG DRUG TESTING. Mga miembros asin mga opisyal kan Naga City Police Office na destino sa Headquarter obligado sa drug testing matapos kan Flag Raising ceremony kan Enero 6, 2025. (Bossing FM 104.7)