Power restoration sa upland Naga halawig pa

Ni Paulo DS. Papa

LAOMAN an harahalawig pang power restoration sa upper barangays kan syudad nin Naga.

Alagad haros mapailawan na an mga barangay digdi na nasa kabababan kan syudad maliban sa Barangay Dayangdang asin Calauag. 

Segun ki Rinner Bucay harani nang makompleto an power restoration kadakle sa mga barangay na kinababalehan kan Abella na nasa 80 por syento nang energized, Bagumbayan Sur – 60, Bagumbayan Norte – 20, Del Rosario – 25, Dinaga – 30, Liboton – 70, Lerma – 25, Igualdad – 95, Tabuco – 40, Mabolo – 80, Concepcion Pequeña – 90, Concepcion Grande – 80, San Felipe – 80, Sabang – 90, Triangulo – 80, Balatas – 30, Sta Cruz – 70, Peñafrancia – 95, San Francisco – 20 asin Tinago – 95. 

Sa Barangay Pacol nanutaran an apat na poste nin kuryente na natumba kan Bagyong Uwan – tolo sa mga ini napatindog guiraray kan Martes na banggui alagad bubweltadahan kan Casureco II segun pa ki Bucay.

Sa ibong kaini an Feeder 64 na nakalokar sa may boundary kan Pacol asin Carolina nasuplayan na nin kuryente – masunod an mga lateral lines na nakatakod digdi.

Sa lado kan Metro Naga Water District (MNWD) aminado si General Manager Florencio Mongoso Jr. na dae pa bastante sa ngonian an supply kan kuryente sa nagkapirang areas sa syudad nin Naga tanganing maibwelta sa normal an operasyon kan mga water pumping stations.

Segun ki Mongoso, napapailawan na kan Casureco II an mga areas na energized sa syudad nin Naga kun haen nakapamugtak an nagkapirang mga pumping stations.

Alagad fluctuated man an supply kan kuryente – dahilan kan pagtenir kan operasyon kan mga bumbahan sa paagi kan generator set.

Laen pa kaiyan, haros maubos man kan mga bombero an supply nin tubig na piggagamit sa paglinig kan mga tinampo sa syudad na lamo sa dalnak dara kan baha kawsa kan Bagyong Uwan.

Dugang pa ni Mongoso, may mga water distribution lines na naapektaran na gayo kan nakaaging kalamidad.

Nagpromesa si Mongoso na bwelta sa normal na operasyon an mga water pumping stations enkaso na makompleto kan Casaureco II an power restoration.