PPO CamSur nag-aandam nasa Balik Eskwela sa Hunyo 16

Pig-aandaman na kan Camarines Sur PNP Provincial Office an nagrarani nang Balik Eskwela 2025-2026 nganing maseguro an seguridad asin bulos nin trafico sa burokasan nin klase na pigtalaan kan Department of Education (DepEd) sa Hunyo 16, 2025.

Sa ginibong virtual Regional Staff Conference kan Mayo 30, 2025 na inatendiran ni Provincial Director PCol Virgilio Olalia Jr. saro sa mga tinukar iyo an burokasan nin klase sa Hunyo 16 na dapat cada Municipal Police Station (MPS) sa provincia segurohon an pagwarak nin kapupulisan orog na sa vicinidad kan mga escuelahan asin imantenir an bulos trafico asin maseguro an paz orden para sa proteksyon kan mga estudiantes.

Kabale sa mga nag-atender sa virtual regional staff conference iyo an provincial staff officers saka an gabos na jefe de pulisiya kan provincia.

Pigseguro kan PPO na dapat iguang nakadestinong kapupulisan harani sa mga escuelahan.

Sa saindang miting kaayon an dapat na magproceso kan mga documentos sa ‘‘untitled PNP lots sa rehiyon, inspeksyon kan gabos na PNP-issued Body Worn Cameras; pagbugtak nin mga CCTVs; preparasyon para sa ISO Certification asin iba pa.

Sa Naga City Police Office (NCPO) na yaon digdi an mga darakulang colegio nagkakaigua naman nin preparasyon bako lang pagwarak nin kapupulisan harani sa mga escuelahan envez an trafico huli ta yaon digdi an problema kun aldaw nin ralaogan sa klase asin mga trabajo. Katuwang kan NCPO iyo an Public Safety Office kan City Hall na saro sa saindang inaatendiran iyo an bulos trafico dawa igua nang mga traffic lights.

An school year 2025 na masikad sa Hunyo 16 hasta Marso 31 nurong taon iyo an pigtalaan kan DepEd mantang an pribadong escuelahan nagtalaan nin sadiring petsa an iba nagsabay na sa Hunyo 16 depende sa administrasyon kan escuelahan.