top of page

Premirong dialysis center sa Partido area, bukas na

Orgulyo kan lokal na gobierno kan San Jose, Camarines Sur na tinukdas sa saindang banwaan an pinaka-premirong dialysis center sa Partido area ka-partner an Renal Solution Plus Foundation, Inc. sa paagi kan saindang Presidente, Ms. Lourdes Briones na tubong Tigaon, Camarines Sur.


An Nephrozone Wellness Center na yaon sa RHU Compound Barangay Boclod, binasbasan sa ginibong ceremonia kan Marso 8, 2024 na pinangenotan ni Secretary Teodoro Herbosa kan Department of Health asin Alcalde Peña na nangenotan sa actividad sa presencia kan mga opisyales lokal asin ka-partner na pribadong organisasyon.


Sinabi kan jefe ejecutivo an dialysis center bako sanang para sa mga residentes kan San Jose envez sa gabos na municipalidad kan Partido area.


Objetivo kan LGU sa dialysis center nganing dai na magastosan an saindang mga pasyente pasiring sa Ciudad nin Naga asin ngunian yaon na sa saindang natad.


Sa ginibong blessing and inauguration laen ki Sec. Herbosa bisita man sinda Undersecretary and Concurrent DOH Bicol Regional Director Nestor Santiago, asin opisyales kan Provincial Health Office kan Camarines Sur. (DA)


DIALYSIS CENTER. Bukas na sa mga pasyente kasunod kan ginibong blessing and inauguration na juespe de honor si DOH Sec Teodoro Herbosa (ika-tolo hali sa wala), sa wala si Alcalde Jerold Peña. (LGU San Jose, CS)

Commentaires


bottom of page