Pres Aquino nagwalat nin mensaje sa Brgy Kapitan

Pigbuyagyag kan dating barangay kapitan asin ngunian regular na miembro kan Sangguniang Panlungsod kan Ciudad nin Naga kan nabubuhay pa si Presidente Benigno S. Aquino III nakiulay sa saiya sa laog nin treinta (30) minutos sa sarong lomang restaurant sa centro kan ciudad kan an pamayo kan nasyon biglang nagbisita sa ciudad.

Alagad sa huring tataramon sa saiya antes sinda nagsuwayan sa restaurant nagwalat nin mensaje ‘‘Walang Mahirap kung Walang Corrupt sa Gobierno’’.

Ini an estorya sa Bicol Mail ni dating Calauag Brgy. Kapitan asin ngunian Consejal Vidal Castillo na maheheling sa retrato an saindang pag-uulay.

Sinabi kaini, na nangyari an saindang urulayan sa kagustohan ni Alcalde Jesse M. Robredo bilang iyo an representantes kan mga kapitanes de barangay kan ciudad asin nangyari sa huring termino kan dipuntong alcalde asin DILG secretary sa biglaan na pagbisita sa ciudad kan dipuntong Presidente.

Simple asin humildeng makiulay mantang an mayor nindang agenda sa miting an mapadapit sa programa sa barangay.

Sobrang kaogmahan ko kaidto an Presidente makipag-ulay sa sarong ordinaryong kapitan sa laog nin 30 minutos, dai niya malilingawan an huring mensaje na ‘‘Walang Mahirap kun Walang Corrupt’’, sabi pa ni Castillo.

Ngunian sobra an kamundoan na matian kan consejal na dai malilingawan dahil tanos an dalagan kan saiyang nilakawan. (DPA)

Presidente Aquino asin Brgy. Kapitan vidal Castillo nag-uulay sa sarong restaurant sa Ciudad nin Naga (File Photo)