Presyo kan bagas sa mercado mababa sa Marso 2024, sabi

Naglalaom an Department of Agriculture (DA) na mababa an presyo kan bagas sa mercado huli ta panahon nin aranihan paroy sa sunod na bulan nin Marso 2024 asin igwa pang inaangkat sa nasyon kan Vietnam an gobierno nasyonal.

Dawa bulan pa nin El Niño alagad mahiwas pang kaomahan sa Bicol an nakahabol sa ‘‘shearline’’ nganing magtarok na pigtalaan kadakli kan mga paraoma mapa-ani sa sunod na bulan.

Si Lovella Guarin, regional spokesperson kan DA Bicol nagpahayag sa Bicol Mail na regular an mga ginigibong pag-monitor kan presyo sa mga mercado sa paagi kan Bantay Presyo Monitoring Team.

Igwang P70 hasta P75 cada kilo alagad pulutan mantang igwa pang hababang presyo nin bagas nagdadalagan sa P55 hasta P57 asin an pinakalangkaw nag-aabot sa P60 hasta P62.

Sagcod sana sa pag-monitor an Bantay Presyo kan ahencia mantang mayo sindang price control nin huli ta susog sa Price Act guidelines, solamente an DA secretary an puedeng magdeclara kan Suggested Retail Price (SRP) pakatapos kan konsultasyon.

An DA bulan pa nin Hunyo 2023 nag-andam na asin nagpaluwas nin mga inpormasyon sa paraoma kan magigin epekto kan El Niño nganing amay makatanom.

Nakadistribuer na sinda nin libreng banhi asin abuno bilang ayuda sa paraoma sa rehiyon Bicol.

Sa National Food Authority, halangkaw si natungod nin paroy sa paraoma matapos langkawan si presyo kan NFA palay buying price hali sa dating P19 sinakat sa P26 cada kilo.

An halangkaw na stock kan NFA rice makakatabang sa food security kan rehiyon encaso magkaigwa nin calamidad.