top of page

Presyo kan karning orig sa NCPM mantenido sa halangkaw na presyo

Nagrereclamo na an mga parasaod sa Naga City People’s Mall (NCPM) apesar kan dai nang dahilan sa epekto kan African Swine Fever (ASF) sa orig alagad padagos man giraray an halangkaw na presyo kan karne.


Alagad an Committee on Consumers Protection sa Sangguniang Panlungsod kan Ciudad nin Naga sa pamamayo ni Consejal Jess Albeus asin DTI mayo pang paliwanag asin aksyon mantang sa pagtaraid na banwaan kan ciudad nagbaba na an presyo kan karening orig alagad sa meat section kan NCPM abot pa sa P300.00 cada kilo.


An Naga City Price Coordinating Council sa pamamayo kan consejal enot nang nag-inspeksyon sa NCPM kan Septiembre 8, 2023 asin sa resulta kan saindang paglibot mantenido pa an dating halangkaw na presyo.


Halangkaw na an suplay kan karning orig sa NCPM mantang sinabi sa media ni Dr. Julius Elad, jefe kan Veterinary Office kan City Hall siya ngani ngalas man apesar dakul an pigbubunong orig sa slaughter house kan ciudad sa Barangay Del Rosario alagad sagcod sa ngunian halangkaw pa an presyo kan karne.


An Department of Agriculture sa paagi kan saindang parataram sa Bicol na si Lovella Guarin nagpahayag na sa ngunian mayo nang problema sa ASF sa ataman na hayop mientras na kun nagbalik si virus sa hayop dai naman nag-ulakit si nangyari sa sarong barangay sa Ragay, Camarines Sur.


Hagad kan nagkaperang consumedores na dai na magpasambit kan saindang pangaran na dapat mag-aksyon si Consejal Albeus sa tahaw kan nagrarani na an bulan kan pasko na posibleng maglangkaw pa an presyo kan karne sa mercado.


Kommentarer


bottom of page