top of page

Presyo kan kopra hinuhurot langkawan

Inaabot sana sa dos porciento sa world demand kan kopra digdi sa Filipinas iyo an mayor na dahilan sa nagparababang presyo kan produkto na apektado an mga paratanum nin niyog.


An dalagan kan presyo nag-aabot sana sa P30.00 cada kilo mantang an kahurotan sa ngunian kan paraoma dapat dai ibaba sa P40.00.


Si John Villareal, Provincial Manager kan Philippine Coconut Authority (PCA) sa Camarines Sur I nagpahayag kaini sa entrevista kan Bicol Mail sa tahaw kan reclamo kan mga paratanum nin niyog na dapat langkawan an presyo kan saindang produkto huli ta nalulugi sinda kaya an iba disganado envez buko o tipong nalang an saindang dinadarang suplay sa mercado nagcacantidad pang P35.00.


An mga nasyones kan Indonesia, India asin Malaysia kabali sa may halangkaw an suplay sa world market.


Mas halangkaw an vegetable oil depende sa presyo sa world market na Palm Oil na nag-aabot sa 35 porciento hasta 36 porciento sa suplay sa world market, sabi pa kan PCA.


An nangyayari sa mga Filipino mas ginugosto an mga inaangkat na lada envez na dapat an domestic product an epekto an paraoma iyo an apektado.


Sa ngunian an ginigibo kan ahencia iyo an training sa paratanum nin niyog nganing makaproducer nin coco-sugar, buko juice asin iba pa para makadagdag sa saindang ingreso sa hanap buhay.


Sa pinaluwas na datus kan grupo nin paratanum nin niyog sa paagi kan KMB FB post an Bicol igwang maabot sa 451,501 hektarya sa kabilogan na 892,000 hektarya kadagaan agricultura mantang dai mababa sa 294,290 familia sa rehiyon an direktang envuelto sa produksyon nin niyog sa dos milyon na populasyon an nag-aasa digdi


Sa ngunian an Bicol ika-tolo sa may halangkaw na produksyon sa nasyon.


Kabali pa sa saindang kahagadan dapat halion an kaltas sa sako asin resiko, dapat magkaigwa nin calibrated na kilohan sa mga comunidad nin niyogan, hagad suportaran an edukasyon kan mga aki nin paratanum nin niyog. Magtao nin mga social services sa mga paraoma, coconut farmers asin dakul pang iba.


Commentaires


bottom of page