Primerong Condo Project sa Partido mapoon na
Ni Sonny Malate
GOA, Camarines Sur --- Arog kan mga centro kan progreso sa ibang parte kan nacion, an banwaan na ini an magkakaigua na man nin condominium sa orug na madaling panahon. An dakulaon na proyectong ini piglalaoman na magiging kasimbagan sa pangenot na pangangaipo sa housing sa localidad.
Maogmang pigpahayag ni Architect - Contractor Bibiano Alindogan Luzande, Jr., project proponent-developer, na an Isarog Midland Homes (IMH), sarong socialized condo housing community marerealizar na sa barangay Matacla digdi. Si Luzande tubong banwaan nin Goa, may mahiwas na track record sa structural design/construction asin urban planning.
Sa paagi kan resolution kan Sangguniang Bayan digdi, sa liderato ni Bise Alkalde Antolin P. Respall, pig-autorisaran si Alkalde Alfredo P. Gonzaga III na maglaog sa sarong Memorandum of Agreement (MOA) para sa proyecto entre sa Department of Human Settlements and Urban Development (DHSUD) asin Home Mutual Development (Pag-IBIG) Fund.
An MOA signing ginibo kan Enero 14 mantang an ground-breaking pigtalaan sa Enero 30 oras na confirmado na kan DHSUD Rehiyon V. Piglalaoman na sa primerong quarter kan taon 2025 mapoon an paconstruir kan enot na condo building. Incargado kan aspeto financial asin verification kan aplicante iyo an Pag-IBIG Fund.
Segun ki Luzande, an housing program nasa irarom kan Pambansang Pabahay para sa Pilipino Program o 4PH, flagship national housing program ni Pres. Ferdinand R. Marcos, Jr.
Objeto kan programa an masimbagan an kakulangan sa housing kan nacion na pigkakarkolong nasa 6.5 million. An 4PH pigpoonan kan 2022 asin may target na zero informal settlers sa taon 2028.
Sa lado kan LGU Goa, an programang ini piglalaoman na macomplemento sa mga initiativa ni Alkalde Gonzaga na padagos na mamantenir an estado kaini bilang centro kan progreso sa Partido. Sa ngonian ini saro nang 1st class municipality.
An condominium namumugtak sa 3,594 sq. m. na lote. Digdi icoconstruir an hasta sa 15ng edificio, may limang eskalon an kada sarong building. An kada sarong condo unit may sukol na 27 sq.m. Kada sarong building igua nin 120ng condo unit. Makikinabang kaini hasta sa 1,800ng pamilya.
Ini may bulanan na hulog na Tres Mil Kinyentos (P3,500.00) Pisos babayadan sa laog nin 30ng taon. Kabali sa bulanan na hulog iyo an insurance asin estate management cost.
An condominium iguang mga amenities arog kan covered play court, multi-purpose social hall, commercial stalls asin swimming pool. Ini harani man sa simbahan, escuelahan asin commercial hub kan Goa.
Calificadong aplicantes para sa condo unit iyo an miembros kan Pag-IBIG na iguang minimum na 24ng bulan na premium contribution. An mga bakong miembros kan Pag-IBIG kaipong magkua nin certificate of eligibility sa LGU Goa asin DHSUD para makaaprobechar nin condo unit.
Pigbuyagyag kan architect-contractor-developer na sa presente, aadalan pa kan local na gobyerno kan Goa an posibililad na ibale sa mga aplicante para sa condo unit an mga bakong residentes digdi.
Dagdag pa niya, an mga interesadong individual pwedeng makihumapot sa saindang Contact Person sa Barangay Hall kan Barangay Matacla, Goa, Camarines Sur. Siring man, sa Municipal Hall kan banwaan nin Goa.

コメント