Prioridad na mga proyecto kan LGU piglatag ni Alcalde Lim

Ni Sonny Malate

Goa, Camarines Sur --- Pigbuyagyag ni Alkaldesa Raquel S. Lim an prioridad na mga proyecto, on-going projects asin proponedong mga programa kan local government unit (LGU) digdi. 

Sa ginibong programa katakod kan primerong sanggatos na aldaw niya bilang hefe ehecutibo, sinabi ni Lim na duwa sa  nangengenot niyang  tututokan iyo an pagbukas  kan serbisyo  kan bagong Partido District Hospital asin an pagconstruir kan mayor na public market building.

An edificio kan hospital na naconsiger ni dating alkalde Antero Lim  sa paagi kan Gobyerno Provincial asin DOH nasa atubangan kan Goa Integrated Central Terminal (GICT). Huli sa mga isyu dapit sa locasyon asin seguridad, ini nakatiwangwang  nin pirang taon.

Segun sa alkaldesa, igua nang naconsiger na fundong P7M  para sa concretong tulay palaog sa hospital. Siring man, P13M  para sa pagconcreto kan embarkment sa may lote kan edificio na nasa bangbangan sana kan Culasi River.

Prioridad pa man ni Lim  na macompleto na an huring phase kan public market -  an construction kan mayor na public market building na nasa atubangan kan  enot na duwang edificio para sa meat, fresh and dried fish asin dry goods section. 

Piglinaw kan alkaldesa na durante kan enot niyang termino may P110M na alocasyon para sa main market building. An nabanggit na cantidad pig-realign sa ibang proyecto kan nagribay sa saiyang alkalde, dagdag ni Lim. 

Sa presente, igua nang initial na fundong P40M para sa mapadagos kan mercado publico. Pursigido si Lim na matapos na ini mantang an Goa iyo an centro kan comercio sa Partido Area.

Sa lado nin edukasyon, padagos an pagconstruir  kan bago asin mahiwas na edificio kan Goa Community College sa barangay Tagongtong. Ini tanganing masimbagan an pangangaipo kan nagdadakulang populasyon kan local na colegio.

Dagdag pa kan alkaldesa, padagos man an libreng sakay sa paagi kan vehiculo kan Tabang Banwaan para sa mga patiente asin bantay ninda sa Goa Municipal Infirmary sa barangay Tagongtong.

Mientrastanto, maogmang pigpahayag ni Lim an esfuerzos kan LGU para sa mga iba-ibang sector kan comunidad. Ini sa paagi kan mga programa katakod sa Salud, Edukasyon, Agricultura, Basic Services, Economic Enterprise,  Peace and Order and Public Safety.

Kabarale pa  digdi iyo an mga servicio asin programa sa Disaster Preparedness, Livelihood, Youth and Sports Development,  Potable Water, Elderly Citizens, PWDs asin IPs, Tourism,  Environmental Protection asin Solid Waste Management.

Sa lado kan pagpatama kan implementation kan infrastructure projects, pigcrear an Municipal Infrastructure Audit Committee (MIAC). Pigbilog man an team na maimbestigar sa mga proyecto na dae naimplementar kan taon 2022 - 2023.

Sa pagtapos kan enot na sanggatos na aldaw sa puwesto nagpasalamat si alkaldesa Lim ki Bise Alkalde Marcel Michael P. Pan asin pag-iriba sa Sangguniang Bayan, mga personahes kan LGU, representantes kan line agencies, oficiales de barangay,  mga Goaeños asin Stakeholders.

Hinagad man niya an saindang padagos na suporta para sa urog pang pag-uswag kan Goa na ngonian saro sa limang 1st class municipality sa cuatro distrito asin may dakulaon na potential na maging enot na ciudad sa Partido Area.