PRO5 naglansar Cyber Patroller, Tracker Team

Sa tahaw kan padagos na paglangkaw kan cybercrime sa Rehiyon Bicol, an Regional Director kan Philippine National Police naglansar kan Cyber Patroller asin Tracker Team na magbanbantay sa mga pasaway sa cyberspace.

Sarong espesyal na grupo kan mga pulis na may misyon magpatrolya sa social media asin internet. Bako sanang sa mga tinampo asin iba pang lugar nagpapatrolya an mga miembros kan pulisiya alagad kabale na sa cyberworld nganing ma-aksyonan asin macasohan an mga envueltong criminal na nagbibitktima sa online.

Segun sa report kan PNP poon kan taon 2024 hasta 2025, nagduble an mga caso sa cybercrime sa Rehiyon Bicol. Sa ngunian igua nang 361 caso an nasa lamesa kan Regional Anti-Cybercrime Unit 5 kan 2025 asin kabale digdi an online financial fraud, online libel, asin pangaabuso sa kababaehan asin mga aki sa internet.

Kabale sa saindang trabajo, bilang cyber patroller, magbabantay sa social media. Nag-aayon sa mga grupo asin pages nganing ma-monitor kun iguang ibang maraot na intensiyon, kun iguang nagkakalat na scam asin nag-aabuso sa online asin digdi ninda nadidiscobre an mga homa na naaraman tolos antes mag-kalat an caso.

Kabale pa sa saindang trabajo, kun igang suspek na nagtatago o wanted, ginagamit ninda an digital footprints, siring kan social media posts, location check-ins, asin iba nganing madakop an mga envueltong pasaway.

Dinagdag pa kan PNP Bicol na kun iguang nagluluwas sa social media na fake news, an Digital Kasurog tolos nagtataong toltol asin tamang inpormasyon nganing dai maloko an publico.

An lakdang na ini kan PRO5 nganing matabangan an mga Bicolano na nag-gagamit nin internet.