PROBLEMA PA SA RIGHT OF WAY: Pagbalyo kan mga postekan Casureco II naaabala

Labi pa sa sanggatos na mga poste kan Camarines Sur II Electric Cooperative (Casureco II) an kaipuhan magabot hale sa tahaw kan mga pinahiwas na tinampo kan Department of Public Works and Highways (DPWH) sa Ciudad nin Naga alagad mayo pang kasegurohan kun matapos an relokasyon ngunian na taon.

Ini an kumfirmasyon kan Casureco II sa paagi kan saindang opisyal na parataram Rinner Bucay huli ta nagdedepende sinda sa fondo saka kun mayo nang problema sa right of way mantang an iba nagsasayuma na magpalaag poste sa pribadong lote na ini an nakakaulang nganing matapos sa laog kan presenting taon.

An sinambit na mga poste sa mga barangay sana kan Balatas, Cararayan asin San Isidro.

Si Alcalde Leni Robredo kan magtukaw sa pwesto saro sa hinurot sa kooperatiba na mahale an mga poste sa tahaw kan tinampo na bako lang ulang sa trafico alagad nagiging causa pa nin aksidente sa mga motorista.

Pigponan na kan Casureco II kan premirong semana kan Hulyo 2025 alagad igua pa sindang inaatubang na mga kaulangan.

An isyu sa relokasyon nin mga poste panahon pa kan administrasyon ni dating Alcalde John Bongat, nagtapos na si anom na taon ni dating Alcalde asin ngunian Diputado Nelson Legacion sagcod sa ngunian iyo man giraray an problema na hinagad na kan bagong jefe ejecutivo kan City Hall nganing aksyonan kan kooperatiba nin electricidad.

An ulang na mga poste sa tahaw kan tinampo nagiging dahilan nin mga aksidente kan motorista asin problema sa trafico apesar pinahiwas na si mga tinampo kan DPWH.

Mga ulang na poste kan Casureco II sa tahaw kan pinahiwas na tinampo kan DPWH sa Barangay Balatas pasiring sa Barangay Cararayan pinapahale kan City Hall. (Bicol Mail)