Problema sa insurhencia sa Bicol matutunaw na, sabi

Posibleng marealisar na an target kan 9th Infantry ‘'Spear’’ Division kan Philippine Army sa Camp Elias Angeles, Pili, Camarines Sur na dagos nang matapos an problema sa insurhencia sa rehiyon Bicol sa ibong kan nadidificilan nang maka-recruit nin bagong miembros an CPP/NPA asin dakul nang mga lider asin miembros an nagsuko sa militar asin nagagadan sa encuentro.

Kun iguang magkasunodan na encuento sa Masbate alagad ‘isolated’ nalang saka sadit na grupo.

Ini an mga pahayag ni Army Major Frank Roldan kan makunduciran nin entrevista kan Bicol Mail sa tahaw kan saindang mga ginigibong estratihiya nganing igua pang mga magsuroko asin operasyon sa natatada nang sadit na grupo.

Dawa dai pa tapos an insurhencia pasiring na ini sa realisasyon nganing tunawon na kan 9th ID an insurhencia sa Kabikolan, sabi pa.

Igua pang natatadang mga lider alagad nasa roving squad nalang sinda na mayo nang kakayahan sa tactical na opensiba, ini huli sa kakulangan finansyal maging logistic requirement hale sa mga nakakalangkaw na lider nasyonal, segun pa ki Major Roldan.

‘'Mas dakul an mga nagagadan sa encuentro, nagsusuko sa gobierno huli ta dai nagtitiwala sa mga propaganda asin nadidificilang nang magkalap nin bagong miembros’’

Si nangyaring encuentro sa Esperanza, Masbate kan Hulyo 8, 2024 na pingenotan kan 2nd IB kan PA, duwang NPA an nagadan sagcod na binayaan kan saindang pag-iriba asin nabawi an mga binayaan decalibreng armas asin iba pang mga kagamitan asin si sunod na bakbakan nangyari kan Hulyo 10, 2024 sa Barangay Igang, Ciudad nin Masbate asin saro an gadan sa tropa kan rebeldeng NPA mantang nagkaperang mga armas asin iba pa nakumfiscar kan tropa militar sa ginibong operasyon kan 96th IB asin maabot sa 15 armadong rebelde an nagdurolag.

Mga armas asin iba pang kagamitan nabawi kan mga soldados kan 9th ID sa magkasuhay na encuentro sa Masbate laban sa rebeldeng NPA. (9th ID)