Produksyon nin tubig kan MNWD nagbaba -Mongoso

Igua nang pagbaba sa produksyon nin tubig sa ibang mga pumping station asin sa burabod nin tubig hale sa Mt. Isarog.

Ini an mga pahayag ni General Manager Florencio Mongoso Jr. kan Metropolitan Naga Water District (MNWD) kan maging bisita sa regular na sesyon kan Sangguniang panglungsod na pinamamayohan ni Bise Alcalde Gabriel H. Bordado Jr., huli kan pag-epekto kan sobrang init nin panahon o Super El Niño.

An PAGASA iyo an nagkumfirmar kan Super El Niño na mamation hasta sa premirong cuarto kan sunod na taon 2027.

Nangapudan si Mongoso sa consumedores nin tubig kan MNWD na kaipuhan dai magsayang sa paggamit nin tubig. Sakop kan serbisyo kan water district iyo an Ciudad nin Naga, Canaman, Magarao, asin Camaligan.

An water district dati igua sanang tolong mga pumping station alagad sa manihamiento ni GM Mongoso ginibo nang sampolo.

Sa ngunian dai pang gayong epekto alagad oras na magsobrang init dai maiibitaran na magluya an bulos nin tubig sa mga residencia, sabi pa kan MNWD.

An lakdang kan manihamiento na maseguro an operasyon kan mga pumping station maging sa burabod nin tubig hale sa Mt. Isarog nganing maseguro an tubig sa ciudad asin pagtaraid na mga banwaan na sakop kan saindang serbisyo.