Profetang Polpol

Tigsik ko an bantay kan kabukidan

Mayong nadadakop na mga pasaway

An illegalista nasa kapatagan

Kahampang kan mga may katungdan!

Tigsik ko man ining Biyaheng Langit

An dalan matunok, hayakpit

An mga viajero kakadikit

Tara na, kita makikisabit!

Tigsik ko an antigong abogado

Mayong ginana dawa sarong asunto

Nakakuang puting kabayong padrino

Wow! Nanagin juez husgado!

Tigsik ko an demonyo

Anas sa raot an gibo

May kutsilyo sa payo

May ogom nin kalayo!

Tigsik ko an patakot sa uma

Nakabantay, magbanggi, mag-aga

Rugnas an payo, bulwat an mata

May nakatugdon nin uwak sa abaga!

Tigsik ko an profetang polpol

Poon pa kan panahon ni Solomon

Sa bunganga kan Mayon nakatugdon

Pighahalat an Aldaw kan Paghukom!