Progresibong grupo pigdenuncia si PBBM, mga pangako mayong nangyari

Pigdenuncia kan progresibong grupo sa Camarines Sur an administrasyon ni Presidente Ferdinand Marcos Jr. sa ginibong protesta sa Ciudad nin Naga antes kan ika-limang State of the Nation Address (SONA) kan Lunes, Hulyo 27 mientras na mayo man nangyari si mga pangako kaini siring kan P20 na presyo kan bagas.

An grupo pinangenotan kan BAYAN, Karapatan Bicol, Gabriela, paraoma asin iba pang mga sektor.

Kabale sa sindang isyu iyo an halangkaw na presyo kan mga mayor na barakalon sa mercado, hababang sweldo sa pribadong sektor, padagos na land conversion na an mayor na apektado iyo an mga paraoma.

An National Food Authority nagpapabakal kan ‘’Benteng Bigas’’ alagad limatadong sektor an calificado asin pili pang lugar.

Sa Ciudad nin Naga sa Barangay Pacol apesar irrigated farm an mahiwas na omahan na dai nag-agi sa tamang proceso sa lokal na gobierno maging sa Department of Agriculture madaling naaprubaran an ‘’land conversion’’ kan Department of Agrarian Reform (DAR) alagad an paliwanag kan ahencia na dai na inooma an sinambit na omahan sa barangay.

An dating Sangguniang Panlungsod kan panahon ni Alcalde asin ngunian representante Nelson Legacion sa tercer distrito kan Camarines Sur, nagpasar nin resolusyon na hinahagad nin paliwanag sa DAR kun panong naaprubaran an land conversion apesar na dai nag-agi sa proceso sa City Hall.