Progreso, kultura pigbubusol kan LGU

Ni Sonny Malate

Tigaon, Camarines Sur --- Sustenido an pagbusol kan local government unit (LGU) kan banwaan na ini para sa kauswagan asin pagparambong kan kultura mantang macelebrar ini kan ika-218ng kafiestahan asin  Tig-aw Festival sa laog kan periodong Agusto 7 hasta 11, 2024.

Segun ki Algene P. Panoy, Municipal Tourism Officer, an okasyon may temang “Progreso kan Banwaan, Kultura Pangataman”.  Mga tampok na actividades digdi iyo an dapit sa kabuhayan, kultura, hubenes, musica asin arte, salud asin kapalibotan. Tampok man an famosong Fertility Dance sa Patrona kan Parroquia, Santa Clara de Assisi na an kafiestahan Agusto 11 saka 12.

Kairiba digdi  iyo an Buy-Anihan bazaar asin food fair, blood letting, fun run, medical mission saka job fair, zumbarangay,  Linggo ng Kabataan asin coastal clean-up.

Siring kan mga nakaaging taon,  pipilion an Miss Tigaon, Miss Gay Tigaon. Igua man kan patiribayan sa musica asin visual arts. Pinakatampok na actividad  iyo an Inter-High School MAPEH DRRM Exhibition na gigibohon sa Tigaon Sports Complex.

Arog kan dati, yaon man an participasyon kan mga Indigenous People (IPs) sa pitong existidong tribu sa banwaan na ini. Sa presente, an LGU naghihinguwa na magkaigua na nin representante an mga IPs sa Sangguniang Bayan digdi.

Sinabi ni Panoy na pighinguwa ni Alkaldesa Chiqui B. Fuentebella na nasa ultimo nang termino, na magin makolor,  makahulugan asin memorable an mga actividades. Ini nakalinya sa esfuerzos kan LGU  na pighimo kan ehecutivo sa tabang kan Sangguniang Bayan sa pamamayo ni Bise Alkalde Jerome Lelis asin dayaday na suporta ni Congresista Arnie B. Fuentebella.

Segun pa man ki Panoy, sa mga actividades na pig-iinitiar kan alkaldesa, pirmi niyang pigbabale an actibong participasyon kan mga namamanwaan. Saro pa man na tampok kan saiyang liderato iyo an ipaharani an servicio kan municipio sa mismong mga barangay.

Pigbanggit man asin pinasalamatan ni Panoy an suporta  kan DPWH 4th Engineering District, Casureco IV, Partido Development Administration, FM Radio CamSur,  LTO, iba pang ahencias asin mismong man-iba-ibang departamento kan LGU.

Mientrastanto,  sa presente, padagos sa  pagigin mabaskog an  local na turismo kan Tigaon. Sa esfuerzos kan Municipal Tourism Office asin danay na suporta ni Alkaldesa Fuentebella, an pangkagabsan na programa kaini pasado sa evaluation para sa Seal of Good Local Governance.

An Municipal Tourism Code asin Tourism Plan an pigpapanday na man.Dagdag pa kaini iyo an pagkakaigua nin museum sa orug na madaling panahon.                         

An advocacia sa turismo kan Tigaon na midmid bilang ‘‘Gateway to Partido” nakapalaman sa slogan na “Visitahon Tigaon!”

Segun pa sa pamayo kan Tourism Office an revenue generation kan banwaan bibo asin pusog, dalan tanganing maglumpat an income classification kaini hale sa third class pasiring sa second class municipality.

An banwaan kan Tigaon namundag kan Abril 20, 1806, base sa libro  ni Dr. Danilo M. Gerona. An Patrona  iyo si Santa Clara de Assisi, midbid huli sa fertility dance para sa mga mag-agom na nag-aarang na biyayaan nin aki. 

Sa Tigaon, an bayle ki Santa Clara de Assisi pigdadayo kan mga devoto hale sa hararayong lugar bako sana sa pagpamibi sa paghagad nin aki kundi magin sa pagngayongayo  nin tabang sa paghanap nin trabaho, pagpaumay sa kamatean asin dakol pang kadeficilan sa buhay.

An ika - 218ng kafiestahan kan Tigaon asin Tig-aw Festival na piglalaoman na magigin makolor sa huring termino ni Alkalde Chiqui Fuentebella. (Photo: LGU Tigaon)