PROPUESTONG BILL YAON NA SA SENADO: Pinapasan na system loss nagdedepende sa consumo

Yaon na sa plenaryo kan senado an propuestong paghale kan controvercial na system loss na pinapasa kan mga cooperativa nin electricidad sa saindang miembros-consumedores.

Alagad perang centavos o pesos sana an cantidad na pinapasan kan miembros-consumedores.

Sa Camarines Sur I Electric Cooperative (Casureco I), sinabi ni Board President Corcordio Romano cantidad sanang 0.7617 centavos cada kWh asin nagdedepende sa consumo sa kuryente an saindang sinisingil.

An ibang cooperativa nin electricidad iba man an cantidad kan saindang singil alagad depende man giraray sa konsumo.

Sinabi kan ibang miembros-consumedores inaabot sa 250 hasta sa 300 pesos an saindang pinapasanan cada electric bill alagad depende man giraray sa consumo.

An propuestong pagtunaw kan SL sa irarum kan Senate Bill 2486 o an Systems Loss Charge Removal Act.

Yaon na sa Senate Committee on Energy na an Chairman si Senador Erwin Tulfo. Sinabi kan senador na dapat halion asin dai pasanon kan miembros-consumedores an ano man na hinahabon sa kuryente siring kan illegal connections, raot na metro, asin iba pang pinapasa kan cooperativa sa systems loss.

An mga cooperativa nin electricidad sa nasyon igua nang inisyal na mga pahayag na saindang kikokontra huli ta milyones pesos an mawawara sa saindang caha na saro sa puedeng dahilan sa kalugihan.