Propwestong ‘franchise renewal’ para sa CASURECO III pigtutulod kan 3 kongresista sa CamSur

Kun bako ngonian na semana, piglalaoman ni Camarines Sur 3rd District Rep. Nelson Legacion na isairarom na sa pagdangog kan House committee on legislative franchises an aplikasyones para sa renewal kan franquisa kan Camarines Sur III Electric Cooperative (CASURECO III) durante kan plenary break na mapoon sa aldao nin Sabado, Junio 6.

Matatandaan, nagsumetir na si Legacion asin si Partido District Rep. Arnie Fuentebella kan House Bill No. 4478 magin si Mamamayang Liberal Party List Rep. Leila de Lima nin House Bill No. 5132 - mga propwestong bill para sa franchise renewal kan electric cooperative komo kasimbagan na man sa kahagadan kan manihamento kan kooperatiba na tabangan sindang magkaigwa nin panibagong pagtugot hale senado na maka supply kuryente sa mga banwaan kan Bula, Baao, Buhi, Bato, Balatan, Nabua asin ciudad kan Iriga - gabos sa Rinconada Area.

Bago ini enot nang pigheras ni Legacion na dae magibo kan electric coop na magrani ki Rinconada District Rep. Migz Villafuerte na saros a mga padreno kan House Bill No 1084 na pigsunad sa kongreso kan Julio, 4, 2022 - laman an kahagadan sa camara baja nin franquesa para sa pigtutulod na Bicol Light Power Corporation.

Katakod kaini, nagpadara na si Legacion nin kasuratan – na nagngangayo-ngayo ki Negros Occidental 4th District Rep. Jeffrey Ferrer, chairman kan komiteba, na ibale sa agenda kan hearings ngonian na semana an aplikasyon para sa CASURECO III.

Alagad susug sa nagin schedule kan komiteba, nakalinyada na an mga pag-oorolayan imbuelto Department of Energy.

Huli digdi, dae na piggilid ni Legacion an posibilidad na baad magsunod nang isalang sa committee hearing an application kan CASURECO III pakalihis kan State of the Nation Address (SONA) ni Presidente BBM na nakatalaan sa Julio 27, ngonian na taon.

Sa ibong kaini, pigtutugot man an committee hearings durante kan plenary break na matapos sarong aldao antes kan SONA kan presidente. Paulo DS. Papa