Protocols sa Del Gallego Border, airport hinigotan kan Capitolyo

Mas pinahigot kan Capitolyo Provincial kan Camarines Sur an protocols sa Naga Airport sa Pili, CamSur asin Del Gallego border puon pa kan nakaaging semana mantang nagdadakul an mga returning residence sa provincia ngunian na semana santa hale sa National Capital Region na may halangkaw na caso kan coronavirus disease.


Ini kasunod kan pinaluwas na Executive Order No. 04 series of 2021 ni Gobernador Migz Villafuerte petsado Marso 23 sa tahaw kan nagdadakul an mga naglalaog sa Camarines Sur nin returning residence hale sa NCR nganing dai makadamay an provincia sa pagparalangkaw kan caso kan Covid-19.


An EO 04 ‘‘An order imposing new guidelines/protocols at the airport and Del Gallego Border’’ asin ini epektibo kan Marso 26, 2021. An mga nagpupuroli hinahagad, 1. Documentary Requirements for Travel na kinababalihan kan *Valid ID na may kumpletong address *Medical/Health Certificates na nagpapaheling negativo sa Covid-19 sa paagi kan RT-PCR test, na ginibo sa laog nin duwang aldaw o 48 oras puon kan petsa asin pagabot sa provincia. 2. Stricker Border Control – An gabos na pasajeros dapat kuanan muna nin temperatura alagad si pasajeros na may sintomas o nagpositivo sa paagi kan antigen test, dapat magpasa-irarum sa mandatory 14-day quarantine.


Sinabi ni Lucena ‘‘Che’’ Bermejo, pamayo kan Environment Disaster Management and Emergency Response (Edmero) kan Camarines Sur puon na itugdas ninda kan Marso 4, 2021 an pag-estricto sa Del Gallego Border haros aroaldaw nakakasabat sinda kan nagpopositivo sa virus.


Maabot na sa cincuenta an saindang napugolan na magpuli deretso sa saindang residencia envez dinadara kan ambulansiya sa Health Center kan provincia sa barangay Banasi, Bula, Camarines Sur.


An Ciudad nin Naga nagbugtak naman kan saindang Screening Team sa Del Gallego Border nganing masara an mga naglalaog sa ciudad asin igwa nang nakadestinong personajes kan City Hall na iyo an nagkukua nin RT-PCR test sa mga returning residence sa Naga.


Sa record kan Department of Health sa Bicol nagluluwas na naglalangkaw an caso kan Covid-19 sa rehiyon na igwang travel history hale sa NCR. (dpa)