Proyekto para sa Sorsogon-Samar Transport Bridge yaon na sa Congreso

Dakulang opurtunidad sa mga taga provincia nin Sorsogon an pigtutulod sa congreso na ‘’20-kilometer Sorsogon-Samar Transport Bridge.''

Ini kasunod kan pig-asegurar kan Asian Development Bank na P500 milyones na fundo para sa feasibility study asin sa ginibong deliberasyon sa plenaryo sa Camara-Baha kan DPWH proposed 2027 budget.

Si House Minority Leader Marcelino Libanan, saro sa mga proponent kan dakulang proyekto pasalamat sa participasyon kan ADB.

An lehislador kan Eastern Visayas pigtutulod na dapat segurohon an pagsumpay kan Matnog, Sorsogon, asin Allen, Northern Samar.

An sinambit na ruta iyo an mayor na agihan haling Luzon asin Mindanao na sa presente mientras na mayong tulay an viaje sa paagi nin ferry boat na kun minsan apectado an viaje sa dagat kun iguang maraot na panahon o may bagyo.

Piglalaoman na susuportaran an pigtutulod na proyekto kan mga Bicolanong lehislador mantang makakatabang sa lado nin economia kabale na sa mga turista hale sa luwas kan Rehiyon Bicol.