Prusesyon sa Amang Hinulid tinugotan na kan LGU Calabanga

Idadagos na an tradisyonal na prusesyon sa bantogan na Amang Hinulid asin iba pang mga santo asin penitential walk sa Calabanga, Camarines Sur sa maabot na semana santa sa Abril 14 – 15, 2022.

Iyan sa pagtubod kan local IATF asin simbahan na sa ika-duwang semana kan Abril 2022 ibababa na sa alert level 1 an banwaan nin Calabanga mientras na padagos nang nagbababa an mga caso sa coronavirus disease.

Si Alcalde Eduardo Severo nagpahayag na iyan an saindang desisyon matapos kan consultative meeting sa simbahan, nag-aataman sa Amang Hinulid, Municipal Police Station, opisyales de barangay asin an Hinulid Council. Duwang taon cancelado an tradisyonal na prusesyon sa semana santa huli kan pandemya.

Sa maabot na Jueves asin Viernes Santo sa saindang kasunduan dapat yaon sa luwas kan chapel an Amang Hinulid nganing dai magsuroksokan an mga sungko sa Hinulid.

An mga aagihan kan prusesyon iyo man giraray an susunodon sa pag-antabay kan PNP nganing mamantenir an health and safety protocols na pigmamando kan national IATF.

Huli sa pagbuelta kan tradisyonal na prusesyon tatawan man nin buelo an mga devotos sa saindang gigibohon na penitential walk sa Jueves asin Viernes Santo pasiring sa chapel sa barangay Sta. Salud na yaon digdi nag-eestar an Amang Hinulid.

Ribo-ribong devotos kan Hinulid hale sa mga banwaan kan Camarines Sur asin hale pa sa ibang mga ciudades an piglalaoman madagsa matapos duwang taon cancelado an mga prusesyon.

Si Police Major Rodolfo Borromeo, jefe de pulisya kan Calabanga Municipal Police Station nakatalaan maghagad sa PNP Camarines Sur nin augmentation force nganing makatabang sa pagmantenir kan paz y orden asin sa trafico.

Afuera pa kaini, an Calabanga MPS macoordinar sa ibang mga MPS sa pagtaraid na banwaan na aagihan kan penitential walk nganing magtarabangan sa pagmantenir sa paz orden. (dpa)