Pugot an Anino

Tigsik ko si Miguel Miguelito

An buhay gusto kutang mabago

Alagad habong rayoan kan bisyo

Kampon kan Diablo, maglayas kamo!

Tigsik ko man si Santi Santilmo

Sa mundo anas raot an gibo

Dae pa man kahampang si San Pedro

Ay! An kalag yaon na sa hurno!

Tigsik ko an panahon kan bagyo

Iguang duwang ugali an tawo

Magayon, angelito an primero

Ikaduwa, raot sa demonyito!

Tigsik ko an Mahal na Obispo

Pigtentaran kan pitong Demonyo

Nakitusayan, sus, dismayado

Nagyugoyugo an Palasyo!

Tigsik ko an lagalag na espiritu

Buhay na buhay pa sa mundo

Alagad isinalya na sa impiyerno

Nag-aagrangay sa init kan kalayo!

Tigsik ko si Conde Condenado

Sarong isinumpang espiritu

Saen man makaabot sa mundo

Pugot an payo kan saiyang anino!