top of page

Pulis kan QCPD dakop sa ilegal na droga sa CamSur

Sarong opisyal kan pulis sa Quezon City Police District (QCPD) asin activong miembro kan CIDG dinakop sa buy-bust operation kan grupo nin awtoridad sa Bicol alas 2:50 nin aga kan Hunyo 24, 2024 sa Barangay Sibujo, Libmanan, Camarines Sur.


Kinumfirmar kan Municipal Police Station, Libmanan sa pamamayo ni Chief of Police Lt. Col Alex Peñafiel an nangyaring operasyon na naarestar an pigngaranan sanang alias ‘'Cpl. Anthon’’ na nabawi sa posisyon kan suspek an pitong mga plastic sachet nin 200 gramo nin shabu na may cantidad nin P1.3-M, duwang badil na calibre .40 asin 1.56 rifle kabale an mga bala.


An suspek, sarong Bicolano asin taga Ciudad nin Iriga na pigtutubodan isusuplay sa Rinconada area an ilegal na droga.


Halawig an ralamagan kan grupo nin awtoridad hale sa provincia nin Quezon sundo sa Camarines Sur.


Pinangenotan an operasyon kan Special Unit 5 kan PNP Drug Enforcement Group, sa koordinasyon sa mga awtoridad sa Luzon Field Unit 5, Provincial Intelligence Unit kan Camarines Sur, Regional Police Drug Enforcement Unit 5, Integrity Monitoring and Enforcement Group, MPS Libmanan, asin iba pang grupo nin awtoridad.


Sinabi ni Lt. Col. Penafiel an suspek tolos sinangatan nin caso sa pagbalga kan section 5 asin 11 kan Acta Republica 9165 o Comprehensive Dangerous Drug Act of 2002


Mientras tanto, inomaw ni PBGEM Andre Dizon, RD PRO5 an grupo nin mga awtoridad na responsabli sa pagkakadakop kan suspek mantang padagos an saindang kampanya laban sa ilegal na droga nganing masangat nin caso sa jusgado an mga suspek.

Comments


bottom of page