Pulis sa Irarom kan Tulay



Tigsik ko ining Pulis Patola

Taklaon an badil na kargada

Kan mag-abot duman sa eksena

Haloy nang tapos an burolyada!


Tigsik ko man an Pulis Matulis

Ayos an porma, hipid na hipid

Kun nakakarani an mga chicks

An bool biyong minataririk!


Tigsik ko pa po an Kapeng Pulis

Nakakapahelang na diabitis

Aw, kawasa kargado sa hamis

Palibhasa pirmi sanang gratis!


Tigsik ko ining si Mamang Pulis

Kinudot an machong si Adonis

Tuminukad sa siyam na bukid

Duman, aldaw-banggi an pagtangis!


Tigsik ko man an pulis trafico

Mayong hutahot an pag-silbato

Pinaalpogan kan hadi kan tinampo

Na-bad trip, an dungo nag-araso!


Tigsik ko an pulis sa irarom kan tulay

Mata mapungay, pahakay-hakay

Suldot sa dungo, nag-hihinungay

Nakahuyom, romdom an pidaypiday!