Raraotan nin mga candidato pinapaagi na sa social media

Afuera kan raraotan sa laog kan barangay nin mga magkalaban sa Barangay, Sangguniang Kabataan Elections (BSKE), an mga raraotan kan mga candidato nangyayari na sa social media.

An Cybercrime Division kan Philippine National Police sa Camarines Sur nagkumfirmar na dai pa ngani nasikad an campaign period kan Oktubre 19-28, 2023 sa BSKE dakul nang mga candidato sa barangay maging SK an nagsangat nin reclamo sa saindang opisina kan mga magkalaban sa maabot na pirilian sa Oktubre 30.

Si P/Capt. Angelo Babagay, jefe kan Cybercrime Division asin sakop pa an Camarines Norte nagbuyagyag na ngunian na panahon nin politica sa barangay nagparalaba si listahan kan mga nagrereclamo huli sa politica alagad si iba pig-eendorsar sa Barangay level na iyo an may jurisdiksyon sa caso.

Si ibang pangraraot na mabalga sa ley kun desidido an nagrereclamo dapat isangat an cyber libel sa jusgado.

An social media iyo na ngunian an ginagamit na instrumento kan ibang mga candidato kan saindang mga propaganda asin black propaganda maging political jingle.

Pigbuyagyag pa ni Babagay na puedi nang masusog kan saindang ahencia an mga vote buying ngunian na pirilian mientras na igwa nang patanid an Commission on Election sa posibleng madiscalificar an mapasaway na candidato sa BSKE.

Hinagad kan opisyal na dapat magsunod sana sa guidelines kan Comelec an mga candidato tanganing mayong problema asin dai mag-atubang nin caso.

Igwa nang nagreclamo sa pagdadaya sa GCash alagad tolos man nindang naresolberan.