Rarom, Rayo, Rikas asin Lawig

Ni Dr. Christian C. Vega

Sa rarom, rayo asin lawig na kang naabot kang satong Banwaan. Nakabariwas na ang kauswagan. Manonotaran niato ang manlain-lain na yaman asin hiyas kang satong mga kahimanwa, yamang simbolo kang taong may maray asin may prinsipyong namamanwaan, banwaang sentro ning aning hali sa kadagaan asin mga pinandaw sa kadagatan. Banwaang pano ning tradisyon, kultura, sining, arte, pagtubod asin relihiyon sa irarom kang maninigong pagmoot asin pagmamalasakit.

Binabariwas ngonian ang pagbantayog kang kabilugan ning Banwaan na kumpwesto ning bukid, umahan, kanyogan, baybayon, mga preskong sira produktong gulay, asin manlain-lain na yamang-dagat na siertong igdi lang mananamitan. Turismo kang pagtubod sa yamang-tawo, puon sa bulungan o hiringhingan kang Sabang hanggang sa alay-lakad sa Amang Hinulid, bako lang iyan ang hiwas kang baybayon asin kabukidan na nagtataong magaya-gayang pagmati sa lambang-saro asin sa komunidad.

Obheto niatong mas paurugon ang pagkabistado ta pa sa istarang pano ning marhay na mandato asin orgulyo. Pinapatalingkas niato ang sarong BANGKA na giya kang banwaan na nagtitimon sa kauswagan sa anumang huna na satong pig-aantisiparan. Balaog ning paglaom asin sentro ang familia na kumpwesto kang sarong Ina na sa halos nasirangan asin nasulnopan na kang aldaw sa paghalat sa kaparehang Agom na hali sa pagsira patunay na simbolo kang malinig asin may prinsipyong hanapbuhay pasiring sa futuro kang mga aki siring man sa kahubenan. Ang manlain-lain na dakop na Sira, simbolismo kang pinagsarararong manlain-lain na pangiturugan asin mauswag na ekonomiya.

Sa tahaw kang mga naunambitang mga yaman asin patara-tara, yaon ang mga akademikong institusyon, ahensiya asin entidad, espisipiko sa ngaran kang Central Bicol State University of Agriculture (CBSUA) na katabang sa paghipno, pagsursi asin pag-tagubhang sa kung ano man ang mga kaipo kang komunidad sa pagsierto kang diretsos kang lambang huben na makakatabang sa pagpanday sa padagos na pag-inog kang kinaban. Ang naunambitang pampublikong unibersidad, nanginginot na ngonian sa Bikolandia asin narekognisar kang bilog na kinaban sa padagos kaining pagpapatalubo sa serbisyong pag-akemiko, innobasyon asin sustinabilidad.

Liwat, patuson nanggad ang bilog na banwaan ning kolor ning Katoninongan, magpadagos ang kauswagan, marhay na gibo kang tawo sa giya kang satong Parokya asin pano na pundasyon nin pagkamoot kang Kagurangnan. Sikad sa padagos na “Pag-Arangkada, Mag-Iribahan kita sa Calabanga, madya na, sa rarom, rayo, rikas asin lawig!” Dios nanggad ang magbalos sa lambang saro, Mabuhay!