Rating Game
Naglibot giraray ako bako lang sa sarong subdivision kan ciudad kundi sa tolong barangay nin banwaan.
Sa mga banwaan palan mas matanog an radyo sa mga harong-harong pero bakong gabos may mga pag-ultanan, siring digdi sa ciudad na taraid-taid anas nagtatanog, maguin musika o bareta.
Ogmahon ako ta maski gabos kan mga estasyon kan radyo nagsasabi na number 1 sinda bako man palan gabos. Haros pigdadarangog FM stations.
Duwa na lang baga an AM ngonyan sa Naga, sarong tara-tagalog saka sarong kakambal nin FM station. Saro lang an 24 hours sa maghapon asin magdamlag na FM broadcast puro pati music. Iyan an pig-aapod na Love Radio na puro love mayong hate. “Kailangan pa bang I-memorize yan?”. An sarong natatadang AM station an Bomboo Radyo na taro-tagalog saka sige an ribay-ribay nin mga announcers.
Igwa nin Kabarangay sa radyo na juruven an DJs saka sige an hiritik-hitik, igwa pang de latang harak-katak. Igwa man Ka-Brigada na magayon an mga bareta lalo na sa nasyonal pero pansingit sana sa mga pigtitindang bulong asin food supplements.
Igwang Be-cool Fm na kool na kool an musika pero halo an lenguaheng English saka Bikol.
An Energy-FM na magayon an musika, magayon pa an mga jokes, igwa nang Jo Osabal.
May Mother Touch na Fm radio na saderi kan simbahang Katoliko. Matitibay an mga announcers, may padi, may madre, may layko. Magagayon an togtog pakapangudto ta nakakapaturog.
An Home Radio, home in the office, home in your car, home in your bedroom pero nakabase sa laog kan Eternal Garden. 80% musika saka 20 % an talkshow pati an nationwide na Karambola.
An Kaibigan mo Radyo kay INK saros a mga nagengenot ngonyan pag-abot sa mga bareta asin public affairs dakul na pati an komersyal asin blocktime programs. May AM na may FM pa.
An Ok-FM may radyo, may TV, may livestreaming sa FB. Balansyado kono sa public issues pero bakong sa bulong, bako sa tindang pang-grocery, lalong bako sa kape.
Bossing FM, political station pero may magayon na musika asin may matitibay na DJs.
Radyo Natin na nagbro-broadcast kan mga programa sa DZRH sa Manila, ni Deo Macalma, Angelo Palmones asin “Dos por Dos” ni Tonying Taberna asin Jerry Baja.
DWNX, kasama mo AM/FM, na kompuesto nin mga radyo man na matindi sa mga bareta asin diskusyon sa politika, panu-pano nin komersyal poon aga sagkod bangui.
DWLV AM pero dati FM kapot kan mga veteranong broadcasters kabali na tong depuntong LRV. Magagayon an music kun weekends.
Idtong dating OS ni Sonia Leaṅio asin itong dating Kakampi Mo anas nang off the air sabi kan NTC.
Kadakul pang ibang pasingit-singit na dai ko nadadangog paglakaw ko sa tinampo. Pero maogma ta haros gabos estasyon nin radyo pigdadarangog man palan kan mga tao.
Gabos number 1 sa kanya-kanyang estasyon kan kada estasyon asin kada announcer.
An pig-iiwalan kan mga radio networks asin stations maski digdi sa probinsiya iyo an pig-aapod na rating game asin audience share. Pag-abot sa income asin hanapbuhay mas dakul an komersyal o advertisements asin blocktime shows dakul an engreso. Lalo na idtong an mga advertisements na nasyonal o haling Manila na bayad kan mga darakulang kompaniya asin darakulang produkto.
Iyan an pagbuhay kan media, engreso hali sa negosyo asin politiko.
Ngonyan na tiempo politika dakul an advertisements hali sa mga politiko lokal asin nasyonal, dakul an ratak, dakul an pitik, dakul an pamalo-malo.
An hapot: ano an pipilion mo-- musika o politika o simpleng bareta sana?