Ray Caceres bagong PD kan DILG CamSur
Igua nang bagong provincial director an opisina provincial kan Department of Interior and Local Government (DILG), matapos mag-asumir sa puesto si PD Ray Caceres, CESO V kan Enero 20, 2025.

Saiyang niribayan si PD Julius Rodel Cal-Ortiz na nadestino na sa opisina rehiyonal sa Ciudad nin Legazpi mantang si Caceres, dating PD kan kaparejong ahencia sa Albay.
An DILG Bicol padagos kan saindang ginigibong pag-okag kan mga pamayo kan ahencia maging si mga pamayo sa manlaen-laen na mga municipalidad. Ini parte na pulisiya kan saindang ahencia huli ta dawa ano man oras puedeng ibalyong destino an arin man nindang opisyal.
Pigponan na ngunian na Enero 2025 nganing dai na sinda hagopon kan election ban na ma-epekto sa Marso 28, 2025 mientras na nagrarani na an midterm elections sa Mayo 12, 2025.
Si Caceres, kaibanan si Cluster Head 1 Jerwin Novio nag-courtesy call na ki P/Col. Virgilio Olalia, Jr. kan Enero 21, 2025 sa CamSur PNP Provincial Office sa Camp Colonel Juan Querubin Miranda, Concepcion Grande, Ciudad nin Naga. Saindang napag-ulay an mas epektibong marhay na serbisyo sa publico enheneral.
Nag-courtesy call pa sinda sa iba pang mga ka-partner agencies sa Bureau of Fire Protection Camarines Sur asin iba pa.
Nakatalaan man isunod ninda an opisina ni Governador Vincenzo Renato Luigi Villafuerte sa sunod na semana.
Commentaires