RD Babagay nagsungko sa mga banwaan kan Rinconada area

Ciudad nin Iriga --- Pakatapos kan saiyang pagsungko sa Peñafrancia fiesta sa Ciudad nin Naga, si BGen Nestor Babagay Jr. regional director kan PRO-5 nagbisita sa saiyang tinuboan na lugar sa ciudad na ini maging sa iba pang mga banwaan kan Rinconada area nganing makihampangan sa mga sibilyan asin negosyantes mientras nakasulot sana siya nin sibilyan.

Saiyang sinabi na an saiyang personal na pagbisita sa ciudad nin Iriga, banwaan nin Bato asin iba pang lugar kan ika-limang distrito nganing dangogon asin maaraman an sentimiento para sa paz y orden asin kooperasyon kan kumunidad mientras nakasulot sana nin sibilyan nakihampangan sa mga residentes asin negosyante para sa katuninognang kan saindang lugar.

Liwat niyang pigpagirumduman an kumunidad an asegurasyon kan PNP nganing maseguro an saindang serbisyo asin pagresponde bukas an 911 emergency hotline para sa cinco minutos na pagresponde sa laog kan urban centers.

Hagad kan pamayo kan Bicol PNP an partnership asin maging bihilante asin kooperasyon sa pagtarabangan kan PNP asin kumunidad para sa katuninongan asin progreso kan sarong lugar siring kan residentes kan mga barangay sa Bicolandia.

Si Babagay asin OIC City Director Col. Gilbert Farinas kan Naga City Police Office iyo an nangenotan sa pagmantenir kan kapupulisan sa paz y orden sa Ciudad nin Naga sa nagtapos na Peñafrancia fiesta.

Sa saindang assessment heneralmente matuninong si nagtapos na Festividad ni Ina sa tahaw kan pinadarang 3,000 na miembros kan PNP augmentation force hale sa PRO-5 sa Ciudad nin Legazpi.