top of page

RD Obingue nagbisita sa NCPO nganing inbestigaran an shooting incident sa Naga

Nakadalagan tolos sa Naga City Police Office aga kan Hulyo 7, 2023 si PBGen Westrimundo Obinque, regional director kan PRO5 para sa miting sa mga opisyales kan PNP digdi nganing personal na inbestigaran an detalye kan shooting incident na an mga biktima sinda Pat Ronnie Revereza Jr. kan Police Station 3, NCPO asin an delivery rider na si Ryan Vargas.


Sa inbestigasyon si Pat Revereza mantang nagrerespondi sa sombong na shooting incident sa pagkakabadil kan delivery rider sa Lomeda Subdivision, Barangay San Felipe, Ciudad nin Naga binadil kan suspechadong Eric Sison kan Hulyo 6, 2023 mga alas tres nin hapon.


Pinaheling kan NCPO ki RD Obinque an mga nabawing armas sa residencia kan suspechado bilang evidencia sa inbestigasyon.

Pinaapod na miting ni BGen Westrimundo Obinque (nasa too) sa NCPO kataid si City Director Nelson Pacalso asin iba pang opisyales kan kan PNP sa ciudad. (PNP Bicol)


An SWAT Team nakaresponde sa insidente mantang an SOCO nagpapadagos pa kan saindang inbestigasyon.


Pakatapos kan miting sa NCPO sa pamamayo ni City Director Nelson Pacalso, an jefe kan Bicol PNP nagbisita sa hospital kun saen naka-confined an biktimang si Revereza nganing aramon an kondisyon asin tinawan nin asistencia para sa hospitalization.


Alagad sinabi ni PSMS Tobias Bongon III, opisyal na parataram kan NCPO apesar kan mga ginibong remedyo kan hospital binawian nin buhay mga 1:50 nin hapon kan kaparejong aldaw.


An Police Officer asin an delivery rider parejong may tama nin bala sa payo kan dai pa sinabing dekalibreng armas kan suspechado na iyo man an causa kan saindang pagkagadan.


An bangkay ni Revereza nabibilaran sa saindang residencia sa Nabua, Camarines Sur mantang nabibilaran man sa saindang residencia si Vargas sa Barangay Balagbag, Milaor, Camarines Sur asin an suspechado nabibilaran man sa Eternal Garden Memorial Park, Brgy. Balatas, Ciudad nin Naga.

Comments


bottom of page