RD Reyes saludo sa resulta kan random drug test sa Camp Ola

An dai palang nahahaloy na magtukaw komo bagong regional director Brig. Gen Mario Reyes kan Bicol PNP nagpahayag nin kaogmahan sa resulta kan random drug test sa 373 na miembros kan PNP huli ta mayong nagpositivo sa ilegal na droga.

Alagad sinabi ni P/Major Malou Calubaquib, opisyal na parataram kan Camp Semion Ola sa Ciudad nin Legazpi nagpahayag na naogma si Reyes sa resulta kan drug test asin naglalaom na sa masunod na random drug test dagos-dagos nang mga negativo.

Sinabi pa kan Bicol PNP bako lang sarong veces, sarong taon envez iimplementar cada cuarto kan taon an kaparejong programa nganing malinigan an organisasyon kun igwa paman na envuelto sa ilegal na actividad.

Kabale si nagpasa-irarum sa drug test na pinangenotan ni Reyes kan Mayo 18, 2022 iyo an 304 non commission, 56 na mga opisyal asin 13 non uniform personnel (NUP) na igwa gabos nin 373.

Inapod ni Calubaquib na ‘‘lucky pick’’ kan biglaan na pina-report sa Camp Semion Ola an mga pulis hale sa anom na provincia kan Bicol.

An ginibo sainda nagkaigwa ngona nin formation asin inatubang kan regional director dai nahaloy pinapila nganing kuanan nin urine test alagad huri nang naaraman na random drug test an gigibohon sa sainda.

Kan mga nakaaging regional director sa mga resulta kan drug test igwang mga nagpo-positivo asin dagos nang nag-aatubang nin caso administrativo. (dpa)