Rebolto ni Andres Bonifacio itutugdok na sa brgy Balatas

Matapos turogan nin limang taon kan Arts, Culture and Tourism Office (ACTO), an paghanap kan tutokdokan, an Andres Bonifacio Committee (ABC) na pigcrear kan Sanggunian Panlungsod kan Ciudad nin Naga nakakua na nin lugar na tutukdokan kan rebolto ni Gat Andres Bonifacio sa bagong Balatas Development Area na harani sa bagong pigtutukdok na Naga City Hospital.


Ini an kinumfirmar sa Bicol Mail ni Consejal Elmer Baldemoro pamayo kan ABC sa ginibo nindang urulay sa plano kan desinyo na yaon an presencia kan representante hale sa National Historical Commission of the Philippines asin kaibanan ninda sa komite iyo an City Engineer’s Office na iyo an magibo kan Program of Work (POW).


Si City Engr. Alexander Caning iyo an mapaluwas kan estimate kun pera an gagamiton na fondo alagad ini magdedepende sa saindang desinyo mantang piglalaoman na puedeng mag-okupar sinda nin 200 metros cuadrado nin lote.


An sanggunian kan ciudad iyo man an matagama kan fondo mantang hinahalat ninda an pinal na desinyo kan CEO asin kan NHCP, sabi pa ni Baldemoro.


Sinabi pa ni Baldemoro na oras na mapunan an kontruksyon kan rebolto ngunian na taon piglalaoman na matatapos an proyekto antes kan Noviembre 30, 2022 nganing magkaigwa na nin selebrasyon an lokal na gobierno sa herowe nasyonal na si Andres Bonifacio.


Sinda Consejal Baldemoro asin Consejal Salvador del Castillo iyo an nagpadreno kan resolusyon kan 2016 na nagdederihir sa ACTO na maghanap nin tamang lugar sa plano na tutugdokan kan rebolto ni Bonifacio.


Alagad disganado an duwang consejal huli ta limang taon nang dai nagpapaheling sa SP asin dai nagsusumiter kan hinagagad na tamang lugar sa rebolto si Alec Francis Santos.


Nag-aksyon an SP na inbitaran si Santos sa sesyon regular kan Enero 2022 nganing hagadan nin paliwanag.


Digdi na nagpuon si proceso sagcod na nagcrear kan ABC na pinamamayohan ni Baldemoro asin an desinyo kan proyekto yaon na sa trabajo kan CEO.


Sinabi ni del Castillo kun babalikan an istorya kun bako sa pag-imponer kan Estados Unidos an national hero kan Filipinas si Andres Bonifacio bako si Dr. Jose Rizal.


Saiya pang sinabi digdi sa Ciudad nin Naga mas marhay pa si Jose Maria Panganiban na sarong parasurat igwang rebolto sa Naga Central School 1.


Sa lado ni Baldemoro, si Bonifacio saro man na national hero asin ama kan Philippine revolution kun bako dahil saiya baka dai pa kita libredo sa pananakop kan dayuhan na haros parejo man an naging kontribusyon ni Dr. Rizal.


Si Rizal igwa nang tolong mga rebolto sa ciudad alagad si Bonifacio inabot nin limang taon napabayaan an saindang resolusyon kan ACTO.


Kun igwa nang magayon na rebolto kaini sa ciuadad marerealisar man giraray cada Noviembre 30 magkakaigwa nin selebrasyon ki Bonifacio. (dpa)