Rebranding kan banwaan na San Jose pigbubusol

Ni Sonny Malate

SAN JOSE, CAMARINES SUR --- Mientras na naghaharani na an celebrasyon kan aldaw kan pintakasi, urog pang nagmamaigot si Alkalde Jerold B. Peña sa  saiyang  pigtutulod na kaisipan na “rebranding” kan banwaan na San Jose pasiring sa San Jose Partido.

Sa intrevista kan mga miembros kan local broadcast asin print media digdi, pig-istorya  ni Peña an saiyang mamondong expeŕiencìa na sa kadakol na veces,  kun pigbabanggit an banwaan na San Jose, an nasa isip kan kadaklan iyo an barangay San Jose na sakop kan banwaan nin Pili, probinsyang Camarines Sur, en vez  na an San Jose na saro sa sampolong banwaan sa Partido Area.

Dagdag pa niya, magkaminsan mas midbid pa kan mga estranghero an barangay Sabang kesa sa banwaan mismong San Jose na nakakasakop kaini.

An Sabang midbid kan kadaklan huli ta saro ining tourist destination. Siring man, ini transit point pasiring sa banwaan kan Caramoan na bistado sa bilog na kinaban bilang sarong tourist haven digdi sa Kabikolan.

An mga bus na dating  may  rutang Manila hasta Partido Area may nakasurat na “Sabang” sa karatula kaini sa vehiculo na orug pang nagpamidbid sa barangay  Sabang sa dakol na tawo.

Tanganing orug na magtatak sa isip kan  kadaklan an pangaran kan banwaan asin magkaigua nin concretong pagkakamidbid o identity,  pinagmarhay ni Alkalde Peña na ini mabisto bilang San Jose Partido en vez na San Jose. Katakod kaini, sa oficial na mga comunicacion, sa social media asin iba pang transaction, ini na an piggagamit  na pangaran kan local government unit.

Orgulyong pigbanggit ni Peña na an San Jose Partido iguang makolor na cultura. Igua pa man ining mga  lugar pasyaran na bako man kasing gayon kan mga tourist attraction sa Caramoan o Siruma, alagad ini may  mga alternative tourist attraction arog kan Adiangao Cave asin an mga bagong resort asin kadagatan digdi.

Segun pa man ki Peña, an San Jose Partido iguang mga lugar  na maaapreciar kan mga turista arog kan mga sadiri kaining  cultural heritage site na lumang simbahan, edificio asin harong na pigconstruir pa kan panahon kan mga Kastila.

Orug sa gabos, sinabi kan alkalde na an kagayonan asin dakulang asset  kan San Jose Partido iyo mismo an mga constituentes digdi na mahuyo an boot, magalang asin religioso.

Mientrastanto, an celebrasyon kan kafiestahan kan San Jose Partido in onra kan Santo Patron na si Señor San Jose, sa Mayo 18 -19, may temang “Salingoy sa Satong Ginikanan, Maogmang Balikan.”

Katakod kaini, may mga actividad na nagpapahiling kan mayaman na cultura kan banwaan sa paagi kan mga suanoy na gawigawi na tampok sa semana kan pintakasi. Ini bilang pagromdom asin pagtaong onra kan pagigin religioso, mahigos asin may marhay na pagkatawo kan mga ninuno kan mga constituentes digdi.

Segun ki alkalde Peña, mientras na an saiyang administrasyon naggigibo nin esfuerzos tanganing magin progresibo an saiyang banwaan sa paagi kan mga flagship programs na pig-iimplementar digdi, pighuhurot niyang ini mabisto sa pangaran na San Jose Partido.

Dagdag pa ni Peña, mawot niyang makaengganyar nin mga investor asin turista sa saiyang banwaan sa paagi kan “rebranding” bilang San Jose Partido.

An hikayat asin imbitasyon kan alkalde sa mga taga ibang lugar: “Dagos po kamo sa San Jose Partido! At home ka dito!”