Reclamo kan Albayano vs APEC dadarahon sa ERC

Matapos madiscobre kan Ako Bicol Party list (AKB) na nagpuputik an Albay Power and Energy Corporation (APEC) sa pagpaluwas nin aviso sa ribo-ribong consumedores sa tamang tarifa nin electricidad, si AKB party list Congressman Alfredo Garbin nagpahayag na saiyang dadarahon sa atensyon kan Energy Regulatory Commission nganing maaraman kun ‘‘overcharging o justify an halangkaw na tarifa.

Padagos na nagrereclamo an Albayano sa paliog na singil sa tarifa sa electricidad kan APEC asin sinda na an may pinakalangkaw na power rate sa onseng cooperativa nin electricidad sa rehiyon Bicol.

Sinabi ni Garbin na an record kan Whole Sale Electricity Spot Market (WESM) asin San Miguel Energy Corporation (SMEC) iyo an basehan kun tano ta dai nagsasabing tama sa publiko an APEC.

Segun pa ki Garbin saiyang napag-araman sa pigpirmahan na mga bilateral contract 24.07 por ciento an pigbabakal na suplay nin kuryente sa WESM puon kan Mayo 26 hasta Hunyo 25 mantang sa SMEC 75.91 por ciento.

Alagad sa mga pinapaliwanag kan APEC sa Albayano pinapaluwas ninda na haros 100 por ciento hale sa suplay kan WESM an saindang binabakal na energy requirement.

Nagsasayuma an APEC na ipaheling sa consumedores nin electricidad an breakdown kan saindang binabakal sa WESM asin SMEC. Nag-aabot sanang P6.70 an presyo cada kilowatt hour sa SMEC mantang P12.84 sa WESM.

An Multi-Sectoral Stakeholders Organization (MSSO) sa tolong congressional district kan Albay nagrereclamo sa maluyang serbisyo kan APEC alagad halangkawon pa an pigsisingil na tarifa.

Hinuhurot sa National Electrification Administration kan MSSO na ibalik sa dating Albay Electric Cooperative (ALECO) mantang an APEC mayong franquicia kan congreso.

Padagos an saindang ginigibong signature campaign laban sa manijamiento kan pribadong korporasyon. (DPAureus)