Red tagging, fake news kinundenar kan SP

Idinagos na kan Sangguniang Panlungsod sa Ciudad nin Naga sa ultimo diya kan termino kan City Youth Officials na ipasar ‘‘in principle’’ an resolusyon na nagkukundenar sa mga ginigibong red tagging asin fake news sa social media contra sa mga activista alagad dae pa nginaranan mantang dai pa nakukumpleto an mga envueltong opisyal kan Philippine Army asin Naga City Police Office.


Pinangenotan ni City Youth Councilor Maria Jessaniel Buena nganing dagos nang ipasar an resolusyon sa ginibong sesyon regular kan Hunyo 14, 2022.


Sa ‘‘division of the house’’ kabale an City Youth Councilor, 15 an nagboto pabor, duwa an nagcontra na sinda Consejales Salvador Del Castillo asin Greg Abonal asin nag-abstain sinda Consejales Vidal Castillo asin Joselito Del Rosario.


Si Consejal Mila Raquid-Arroyo nagsabi huli ta sensitivo an resolusyon na envuelto na an pangaran kan Sangguniang Panlungsod mantang ultimo diya na an termino kan City Youth Officials ‘‘in principle’’ aprubaran na ngona an resolusyon.


Enot nang nag-prubar an City Youth Councilor na itulod an pagpasar kan resolusyon alagad iginilid ngona kan SP nganing makua an lado kan Philippine Army, NCPO asin Punong Barangay kan Concepcion Grande antes ipasar an propuestong resolusyon.


Nag-atubang na sa sesyon an NCPO, PNP asin PB alagad huli kan sensitivo an urulay pinadagos sa paagi kan executive meeting kan Lunes, Hunyo 13.


Kan Martes, Hunyo 14 nagkasararo na aprubaran an resolusyon ‘‘in principle’’ mantang papakarhayon ngona an wording.


An isyu sa red tagging asin fake news contra sa mga activista nagbutwa huli kan mga reclamo kan nagkaperang mga residentes sa Sitio Balatungan, Concepcion Grande, Ciudad nin Naga sagcod na nagkakatarakot an residentes huli kan soboot harassment kan mga awtoridad.


Si Consejal Castillo nag-abstain sa resolusyon huli ta igwa man naginibohan an Philippine Army asin NCPO sa Sitio Balatungan. (DPAureus)