top of page

Regular na pagbakuna sa mga kaakian ipapadagos

Dawa dai pa tinatapos kan Department of Health (DOH) an Covid-19 vaccination alagad saindang tatawan nin prioridad an pagbabakuna sa mga kaakian na kinababalihan kan anti-polio, tipdas asin dakul pang iba.


Si Dr. Ernie Vera, regional director kan DOH Bicol nagpahayag na kulang si mga nabakunahan na mga kaakian kan nakaaging duwang taon huli kan Covid -19.


Maabot sana sa treinta por ciento mga kaakian an saindang nabakunahan mientras na saindang prioridad an paglaban sa coronavirus disease alagad dawa nagkulpa na an caso kan virus nagpapadagos pa an booster vaccination sa gabos na municipalidad.


Magiging envuelto sa immunization iyo an mga Municipal Health Office sa lambang lokal na gobierno asin mga Barangay Health Workers.


Sa lado kan Department of Education (DepEd) hahagadon an saindang kooperasyon asin suporta nganing an mga nasa elementarya makumpleto an mga immunization. Katuyohan kaini kan DOH para sa proteksyon sa salud o ano man na kahilangan kan mga kaakian.


Target kan ahencia an 70 hasta 80 por ciento kan mga kaakian sa rehiyon makumpleto nin bakuna.


Mientras tanto, piglinaw pa ni Director Vera na nagpapadagos pa an saindang booster vaccination mantang igwang mga pigdesignar na lugar na vaccination site an LGUs.


Sa ngunian nagrerecover na an Bicol sa Covid-19 mala ngani igwa sanang anom na caso kan Enero 2023 an saindang pasyente.

Comentarios


bottom of page