top of page

REHABILITASYON KAN MNSC MASIKAD SA HULYO: Ordinansa sa pagpaarkila kan MNSC dagos nang ibabasura

  • Writer: Bicolmail Web Admin
    Bicolmail Web Admin
  • Jun 16
  • 2 min read

Dagos nang ibabasura kan matukaw na bagong administrasyon kan City Hall an ordinansa sa pagpa-arkila sa pribadong sektor kan Metro Naga Sports Complex sa Barangay Pacol kasunod kan iimplementar tolos sa Hulyo 2025 an rehabilitasyon kan MNSC.


Si Mayor elect Leni Robredo kinumfirmar sa social media na igua nang bagong disenyo kan proyekto na planong iimplementar sa pagtukaw niya bilang bagong jefe ejecutivo mantang raraot na an mga facilidades siring kan grandstand, opisina asin dakul pang iba.


Kabale sa dapat maponan sa phase l iyo an grandstand, mga opisina, viewing decks, asin jogging lane na target matapos sa Deciembre 2025. Isusunod iyo an swimming pool, tennis asin basketball court, asin an kaenterohan na diez hektaryang sports complex.


Enot nang sinabi kan matukaw na alcalde na nakasakdo siya nin cantidad P100-M hale sa tabang ni Senate President Chiz Escudero para sa sinambit na proyekto.


An grandstand naraot kan maglamasa si bagyong Rolly kan taon 2020.


Pinaheling na niya sa FB page an desinyo matapos kan saiyang ginibong konsultasyon sa mga representantes kan athletic association.


Oras na matapos an rehabilitasyon piglalaoman ni Robredo puedeng mag-host giraray an ciudad nin national sports events.


An presenting Sangguniang Panlungsod nagpasar nin ordinansa numerado 2023-96 nganing paarkilahan an MNSC alagad an matukaw na bagong administrasyon dai na ipapadagos envez City Hall man giraray an mamahala.


Kun nadagos sa presenting administrasyon kan City Hall an sports complex papaarkilahan nin P100,000 bulan-bulan sa laog nin 15 taon alagad ‘‘renewable’’.


An MNSC pinagibo sa administrasyon ni dipuntong alcalde asin DILG secretary Jesse M. Robredo na natapos kan taon 1997.

Bagong desinyo kan lomang MNSC poponan tolos sa premirong semana kan Hulyo 2025. (Retrato: Atty. Leni Robredo FB)

Comments


bottom of page