REHABILITASYON KAN PNR NADISKARIL: Bad news, good news sa Bicol, sabi

Liwat naman nadiskaril an pangako kan gobierno nasyonal na masikad na an modernisasyon kan Philippine National Railways (PNR), mamundong bareta ini sa mga Bicolano alagad ‘‘Bad news asin Good news’’.


An Gabriela Bicol nagpahayag kaini sa paagi kan saindang lider Nica Ombao. ‘‘Bad news ta inaasahan ngani an modernisasyon kan perokaril na PNR will be a better, faster and cheaper alternative for Bicolanos traveling to Manila mantang an sektor nin transporte dai pa nakakahawas sa pagkalugi dahil kan pandemya, nadagdagan pa kan padagos na paglangkaw kan produkto nin petrolyo’’.


Alagad good news ta kan makaulay kan Gabriela Bicol an mga nag-eerok sa gilid kan relis kan train, igwa sa sainda an mga papahalion na mga harong alagad daing kasegurohan nin relocation o compensation na dapat i-opresir kan gobierno, sabi pa ni Ombao.

Sa ngunian nagkalma an gobierno sa iimplementar na ‘‘demolition’’ kan mga pobreng nag-eestar sa gilid kan relis nin train.

Digdi sa Bicol an viaje sana iyo an commuter train hale sa Ciudad nin Naga sundo sa Sipocot, Camarines Sur.

An planong rehabilitasyon kan Bicol PNR puros sana pangako kan mga nakaaging administrasyon, liwat naman nangyari ngunian.


SABI KAN DOTr


Si Undersecretary Cesar Chavez kan Department of Transpotation (DOTr) iyo an nagkumfirmar sa media sa Manila na an gobierno kan China dai nag-aksyon sa administrasyon ni dating Presidente Rodrigo Duterte para sa inuutang kan Filipinas nganing iyo an mag-fondo sa tolong mayor na railway projects, huli kaini konsiderado nang isinibog kan sinambit na nasyon alagad plano giraray kan top official kan ahencia na ipadagos an negosasyon.


Sinabi pa kan DOTr na deretso nang ‘‘back out’’ an China. Nagsibog an sinambit na nasyon nganing fondohan an Calamba sundo sa Bicol na cantidad Php142 bilyon; kabale an hale sa Clark sundo sa Subic cantidad Php51 bilyon asin an Mindanao Railway cantidad Php83 bilyon dai na makakaabante an bilyones peso na proyekto huli kan kawaran nin fondo.


An mga proyecto parte kan Build, Build, Build program ni Duterte alagad sa administrasyon ni Presidente Ferdinand Marcos Jr. ‘‘bad news’’.


An National Economic and Development Authority (NEDA) inaprubaran an tolong railway projects na fofondohan sa paagi kan official development assistance (ODA) hale sa China.


Alagad an sinambit na negosasyon, na nagpoon kan 2018, dai narealisar matapos iginilid sana kan China an kahagadan kan gobierno Filipinas nganing mapondohan an mga proyekto. (DPAureus)