Rehistradong votantes sa Naga madugang 8.39%

Kun nadagos an pigtalaan na Sangguniang Kabataan asin Barangay elections kan Deciembre 5, 2022 an Ciudad nin Naga igwang total na 119,119 rehistradong votantes alagad piglalaoman liwat naman madugang nin hasta sa 8.39 porciento o maabot sa diez mil na registrant sa pagsikad kan pagpalista sa opisina kan Comelec sa ciudad kan Deciembre 12, 2022 para sa pag-andam kan eleksyon sa Oktubre 2023.

Si Abogado Maico Julia Jr., election officer sa Ciudad nin Naga nagpahayag na base sa pinakahuring resolusyon kan commission nagpako kan liwat na pagpalista nin mga votanes kan Deciembre 12, 2022 hasta Enero 31, 2022 bilang pag-andam sa madadagos nang SK asin Barangay elections nurong taon.

An sinambit na eleksyon pig-uktaba kan congreso sa dahilan na natatapos palang an pirilian lokal asin nasyonal kan Mayo 9, 2022, alagad sinabat man ini nin petisyon sa Corte Suprema ni election lawyer Romy Macalintal huli kan cuestion legal sa pag-uktaba kan SK asin Brgy elections.

An Liga nang mga Barangay sa nasyon naka-antabay sa posibleng maging pinal na desisyon kan SC.

An mga aplicante kinababalihan kan registration, transfer, change/correction of entries, reactivation, reinstatement, transfer of registration records from foreign post to local.

Magkakaigwa man nin satellite registration an Comelec-Naga sa mga barangay asin mall nganing mas dakul an magpalista.

Mientras an mga kaipuhan darahon siring kan valid IDs lokal man asin nasyonal asin birth certificate sa mga jovenes na premiro pa sanang mavoto sa pirilian nurong taon.

Sa lado kan mga overseas voter registration poon ngunian na Deciembre 9 hasta Septiembre 30, 2024. (dpa)

Sa nagpapadagos na voters registration sa Ciudad nin Naga haros aroaldaw nagruruso an mga aplikante nganing magpalista asin makaparticipar sa SK asin Brgy Elections nurong taon. (dpa)