top of page

REKISITOS KAN BAI SA LGUs DAPAT KUMPLEHON: Municipalidad na masinutildai madedeclarang ASF free

Sa tahaw kan nagbabalik naman an African Swine Fever (ASF) sa hayop sa ibang provincia, dakul pang mga municipalidad sa Bicol dawa zero na sa caso alagad dai pa puedeng ideclara na ‘‘ASF free’’ sagcod na dai pa nakakasumiter nin mga dokumentos na pigmamando kan Bureau of Animal Industry (BAI).


Sa anom na provincia sa Kabikolan an Albay asin Masbate iyo an ‘‘100 percent accomplishment’’ na nakasumiter kan rekisitos na saro sa hinahagad kan BAI iyo an ‘‘Municipal Ordinance on adoption of BABAY ASF’’ asin tolo pang iba.


Sa datus kan Department of Agriculture (DA) sa Bicol, sinabi kan saindang regional information officer Lovella Guarin na igwa pang mga municipalidad an sagcod sa ngunian igwa pang 22 na mga banwaan dai pa nakakasumiter sa BAI kan mga minasunod na rekisitos hali sa ‘‘Red zone’’ pasiring sa ‘‘Pink zone’’, 1. Municipal ordinance on adoption of BABAY ASF; 2. Summary of ASF history; 3. List of trainings on Swine Biosecurity attended by hog raisers and LGU staff asin 4. Farm, Registry of town and membership to Registry System for Basic Sectors in Agriculture (RSBSA).


Kun nakumpleto na puedeng magdeclara nin ASF free an ahencia sa sarong banwaan.


Sinabi pa ni Guarin aram na kan mga LGUs an sinambit na mga rekisitos alagad apesar na dakul na an puedeng ideclara hali sa ‘‘Red zone’’ pasiring sa ‘‘Pink zone’’ dai pa narerealisar huli kan kawaran cooperasyon.


An Red zone iyo an mga lugar na igwa pang caso nin ASF mantang an Pink zone declarado na bilang zero sa caso sa virus sa hayop o ataman na orig.

Pinapadarakulang mga orig-orig kan sarong paraoma sa Barangay Pacol, ciudad nin Naga na salbado sa caso sa African Swine Fever. (ERA/DPAureus)


Sa mga apektadong provincia sa rehiyon an Camarines Sur igwang 25 municipalidad digdi alagad 15 sana an nakakumpleto sa rekisitos kan BAI na declarado nang ASF free o nasa Pink zone.


Sa Camarines Norte sampulong municipalidad na apektado alagad walo an nasa Pink zone; sa Sorsogon sa walong municipalidad na apektado anom pa sanang banwaan an yaon na sa Pink zone asin sa Catanduanes sampolong municipalidad an dating apektado asin sa ngunian duwa pa sana an nasa Pink zone.


Maabot sa dating 65 mga municipalidad an total na apektado sa kabikolan na inagihan kan ASF alagad sa ngunian maabot sa 22 pa sana an declarado nang ASF free.


Poon na magbungkaras kan 2020 an virus sa hayop 23,800 an tinalbong sa irarum kan daga na dating pigbabayadan kan DA nin Php5,000 cada payo alagad sa ngunian binabayadan na kan insurance company o PCIC. Katuyohan kaini nganing dai na maglakop an virus sa mga barangay.


Nagdistribuer na nin mga ‘‘sentinel pigs’’ an DA sa dating apektado alagad kaipuhan mabuhay o dai maghelang nganing ideclara an sarong lugar sa Pink zone. (DPAureus)

Comments


bottom of page