Remembering Tata Flores

Dai ko nanggad malingawan an makolor na buhay ni Tata Flores, an lider nin mga bakla sa Naga kaidtong dekada 80. Si Tata Flores, propiong Naguenio, asin gikan sa mga kagalang galang na familyang Flores na may ancestral home sa Penafrancia Avenue sa may atubangan kan dating puesto kan Post Office. Si Tata Flores an nagtugdas kan famosong Cher Ami Club, organisasyon nin mga bakla sa kabikolan. An Cher Ami Club, may objetibo na tukduan an mga bakla sa linya nin Fashion Design, Pageant Choreography, Dressmaking, Beauty and Make up tanganing an mga bakla maging produktibong miembros kan sosyedad. Kaya an opisina ni Tata sa francia pano nin mga joven asin gurang na bakla na iguang pig gigibo arog kan pag lilin nin gayad kan gown, pagtahi, pagtastas nin mga haluwag na barong asin bestida, iguang nag mamanicure, iguang nag pepedicure asin dakul pang ibang trabaho. 1971, kan mabisto ko si Tata Flores sa campus kan Ateneo ta ako kaidto nagtatrabaho bilang katabang sa Ateneo de Naga Canteen kan. Nahiling ko nag oorogma an mga estudyante sa may atubangan kan Gym, kaya palan ta si Taga Flores nakikipag boksingan sa saiyang kaklase na may gamit nin glove. Kumbinsido an mga paradalan sa mala Cassius Clay na hiro ni Tata Flores, matibay may jab asin garong butterfly kung mag float palibot sa saiyang kalaban sa boksing. Si Tata Flores, an libre daing bayad na nag design asin nag tahi kan simple alagad magayon na traje de boda ni misis ko kan kami kasalon kan July 22, 1984. Si Tata naging maboot sakuya ta paborito niya daa kayang pag dangogon an programa ko kaidtong Alkalde sa Kusina sa estasyon kan DWRN sa sitio Queborac, mala ta ako an paborito niyang kuanon na Emcee sa saiyang Miss Gay Penafrancia. An Miss Gay Penafrancia iyo an pinaka dakulajnng okasyon sa Plaza Quezon antes kan Kafiestahan ni Ina, ini pig gigibo sa kabanggihon kan Traslacion. An pagarayonan kan mga bakla gikan sa manlaen laen na lugar sa kabikolan, pinag aarabangan ta ini makonsuelo lalo na pag abot sa talent portion ta an mga bakla mas ma telento kesa sa ordinaryong babae, matibay sinda magkanta, matibay magbayle ta kadaklan sainda mga dance instructress, asin matibay sinda maging sa linya nin gymnastics. Sa Miss Gay Penafrancia pinag hahangaan sinda sa evening gown competition ta sinda mismo an nagdesinyo asin nagtahe kan saindang gown na huna mo mga kandidata sa Miss Universe, pero siempre an pinaka aabangan iyo an pag sulot ninda nin swimsuit ta duman pig hihiling kung papano ninda itinatago an boke de giera na dai magbukol sa saindan swimsuit asin maghitsurang garong tunay na babae. Iguan nagsasabi na tanganing dai marisa , ini pig gagakudan nin tamsi, o bagaman pig tatapalan nin mapuloton na plaster na haros pa sana dai pahangoson nin buelo. Sa perang beses kong pag Emcee sa Miss Gay, an dai ko malilingawan an ultimong presentasyon na nag init an payo ni Tata asin naanggot sa perang kandidata na iyo an dahilan kaya nagka iguang gap an Swimsuit Parade portion. An mga para dalan langkag na ta dai pa nagruruluwas an mga kandidata para maglayaw layaw sa sulot nindang Swimsuit, kaya palan ta an mga ini maogmang nag tsitsirismisan sa backstage asin duman sinda pig daguso ni Tata, asin an pera sainda irinibag sa lanob kan backstage kaya pagluwas sa stage iguang taragilid maglakaw ta sa kukulog lawas na sinapo. Pero maski siring, naghagad sainda nin despinsasyon si Tata asin liwat naging marhay an iribahajn sa Cher Ami Club. An pag respeto ki Tata kan mga bakla sa Naga garong sarong matuang tugang o sarong magurang ta si Tata iyo an saindang parasurog kun an iba sainda nakaka laog sa kontrobersyal na sitwasyon arog baga kan, pig dakop kan mga pulis ta matanga na sige pa ang ralayaw layaw sa Quince Martirez asin sige an pang sitsit nin mga nag aaging kalalakihan, an iba man iyo an pig rereklamo nin mga lalaking teen ager kun sinda pig kokorner sa laog kan CR sa mga sinehan. Kan dai pa uso an NBA sa telebisyon, mas pig dadalan kan mga bikolano iyo an Inter Barangay sa Naga City na si Tata Flores an saro sa opisyal kaini, ang pabasketball nin 27ng barangay pinag gigibo sa Plaza Quezon asin dinadalan nin kadakulon na tawo. An perang miembros kan Cher Ami Club, yaon pa sa Naga, an iba sainda mga senior citizens na asin saindang nagigiromduman an maogmang pag iribahan sa panginginot ni Tata Flores. An iba sainda naka pag trabaho sa abroad dara an adal sa Fashion Design ni Tata Flores. Saro sa magayon na legacia ni Tata sa mga bakla sa Naga iyo an mamuhay nin tunay na bakla na magalang, mapagmahal sa magurang, asin mahigos , produktibo asin bakong pasaway sa Plaza Quince Martirez.