Rep. Bordado nakatongtong liwat sa natad kan City Hall

Sa tahaw kan nagrarani na an eleksyon lokal sa 2025 naimbitaran giraray si Representante Gabriel H. Bordado Jr. kan tercer distrito kan Camarines Sur sa pag-comemorar kan Ciudad nin Naga sa ika-66 na birth anniversary ni DILG Secretary/City Mayor Jesse M. Robredo kan Mayo 27, 2024 na ginibo sa JMR Museum.

Nagpasalamat si Bordado sa imbitasyon kan City Hall matapos an labi sa sarong taon etsafuera sa actividades kan lokal na gobierno kan ciudad. Sinabi kan lehislador na ka enot-enoting imbitasyon sa saiya sa programa kan Mayo 27 matapos kan labi sa sarong taon piglingawan na siya.

Magigirumduman sa nagluwas na doceng pahinang surat ni dating VP Leni Robredo sa mga miembros kan Sangguniang Panlungsod afuera kan isyu sa STL/jueteng payola, reparo sa subasta sa mga proyecto asin iba pa naonambitan kun tano ta dai na sinda ni Bordado pig-iimbitaran sa mga importantenteng actividades kan ciudad.

Sa mensaje kan congresista sa birth anniversary kan dating alcalde asin DILG Secretary pigrumdum niya an pinag-agihan ninda, pag-ibahan sa BRBDP, naging opisyales kan Ciudad nin Naga, si Robredo naghakot nin mga award asin primerong alcalde sa nasyon na nag nagrecibe nin Ramon Magsaysay Award, hale sa 3rd class naging 1st class an ciudad asin nagpa-oso kan good governance. Mga paglapigot bako sana sa Naga alagad sa enterong nasyon kan maging DILG Secretary.

Sa termino ni Robredo nagpaheling kan marhay na liderato, silag na pagpadalagan kan gobierno, nagkaigwa kan modelong participatory governance.

Namidmid an saiyang ‘’Tsinelas’’ leadership style, paglaban sa kurapsyon, yaon an saiyang perming kahandaan sa ano man na calamidad asin may integridad.

Si dating VP Leni Robredo na nag-atendir sa graduation ni Tricia sa Harvard Medical School nagtao man kan saiyang mensaje sa paagi nin video.

Sa programa presente an opisyales lokal sa pamamayo ni alcalde Nelson Legacion, Bise Alcalde Nene De Asis, mga miembros kan Sangguniang Panlungsod, opisyales de barangay asin iba pang sektores.

Rep. Gabriel H. Bordado Jr. nagtataong mensaje sa pag-comemorar kan Ciudad nin Naga sa ika-66 na birth anniversary ni Secretary/Mayor Jesse M. Robredo. (Phine Lomenario Salvino)