Requisitos sa paghagad nin confiskadong kahoy sa CENRO pigpaluwas

Ni Sonny Malate

Goa, Camarines Sur --- Pinaluwas kan Community Environment and Natural Resources Office (CENRO) sa paagi ni Cesar Basil S. Camba, pamayo kaini, an mga panundon sa paghagad nin mga kahoy na naconfiscar kan oficina  ninda. 

Susog ki Camba an mga nakatambak na good lumber asin iba pang forest products  sa saindang compound na igua nang order of finality hale sa CENRO  ipinapanao sa mga interesadong partido basta nag-agi sa tamang proceso. Ini base sa DENR Administrative Order No. 97- 32. Susog sa ley,  an DENR iguang quasi-judicial function.

Dagdag kan pamayo, an pagdispatsar kan mga confiskadong forest products pinagmarhay kan saindang oficina tanganing mapreservar an economic value kaini asin mapakinabangan kan publico imbis na malapa sana sa depository area ninda.

Sinabi pa niya na an priority na makarecebi kan mga good lumber iyo an Department of Education (DepEd) asin mga consejo de barangay na mayo o kulang an fundo para sa kinakaipohan na materiales sa proyektong infrastructura ninda.

An kaipong mga  requisitos iyo an letter of intent asin endorsement kan representante kan requesting party, an plano asin bill of materials kan proyekto asin an patotoo kan autorisadong representante na dae bastante an fundo para sa proyekto.

Sa presente, an CENRO iguang  documentadong record kan mga forest products na nakatambak harani sa edificio kan oficina. Huli sa nagdadakol na volume kaini, iguang pigconstruir na bagong  edificio tanganing maacomodar an kahoy, oring asin ibang forest products digdi.

Pigtawan doon ni Camba na an pribadong persona o grupo asin relihiyosong organisasyon an dae calificado na mag-aprobechar  kan libreng material gikan sa CENRO. 

Mientrastanto, piglinaw kan CENRO officer na an mga pribadong individual pwedeng magpapalod kan kahoy sa lote ninda orug na kun ini peligrosong makahumbal nin tawo, harong o iba pang pagrurogaring. 

Soboot kinakaipohan sanang ipaisi asin maghagad nin permiso sa barangay oficial sa pagpalod kaini, dawa ipahuri na an permiso kan saindang oficina. 

Sa presente, an CENRO pursigido  sa paglapag sa mga illegal na paraputol nin kahoy sa paagi kan awtorisadong  personahes ninda. An maninigong caso an pigsasangat sa mga ilegalista  base sa ley.

An CENRO sakop an apat na banwa kan probinsya apwera kan sampolong  banwaan sa Partido Area. An kadaklan kaini iguang kabukidan na mayaman sa recursos naturales asin  paboritong tatagahan kan mga ilegalista.

Huli sa kahiwasan kan saindang hurisdiction asin kakulangan nin personahes, si Camba nag-apelar sa publico na makipagtabangan sa saindang esfuerzos sa pag-ataman kan kapalibotan para sa karahayan kan bilog na comunidad. An pangangataman kan kapalibotan bako sana sa  CENRO kundi kan kagabsan, dagdag niya.

Naconfiscar na mga kahoy saka oring kan CENRO sa mga illegalista. (Photo - CENRO Goa)