Resolusyon kan SB sa pagtabang sasa biktima kan bagyo dai naghihiro

Pirmado na ni Alcalde Fermin Mabolo kan San Fernando, Camarines Sur an sarong resolusyon kan Sangguniang Bayan na gamiton na muna an cincuenta (50) por ciento kan siete milyones peso na fondo na pambakal nin mga dump truck nganing itustos muna sa pagtabang sa mga familia sa barangay na biktima kan duwang nakaaging makukusog na bagyo.

Alagad duda an SB kun ma-aksyon an jefe ejecutivo nin huli ta sagcod sa ngunian dai pa nagpapaapod nin miting kan Municipal Development Council (MDC), na saro ini sa proceso nganing gamiton muna na an fondo para sa dugang na mga relief operation sa mga biktima kan nakaaging bagyong Rolly asin Ulysses.

Dakul pa an lakmang kaharongan asin dai pa nakakabangon an saindang pagbuhay na kaipuhan an tabang kan lokal na gobierno.

Ini an mga pahayag ni Bise Alcalde Allan Valenzuela mantang pasiring na sa ika-duwang semana an Deciembre alagad an jefe ejecutivo dai pa nagpapaapod nin miting kan MDC.

Sinabi pa kaini, na planong magpasar sinda liwat nin resolusyon nganing sa ika-duwang veces pagirumdumon na si Alcalde Mabolo mantang dai man nahihiro an siete milyones peso mas marhay pa gamiton na muna an dawa ciento por ciento para matabangan an dakul na mga residentes sa barangay na apektado kan nakaaging mga calamidad.

Alagad an problema dai sinda nakakaseguro na magkakasararo mantang mayoria sa miembros kan consejo kaalyado kan alcalde.

Haros maubos na an saindang calamity fund huli ta nagamit ta sa panlaban sa pandemya asin nasunodan pa nin super typhoon Rolly alagad mas nagrabe ni bagyong Ulysses.

Mayo pa man nin reaksyon an jefe ejecutivo na iyo an hinahalat kan SP, sabi pa ni Valenzuela.

An fondo sa pambakal nin pitong dump truck kan nakaagi pang 2019 mas marhay pang gamiton na muna nganing makatabang an LGU sa mga apektado kan calamidad.

Afuera kan dikit na enot na ayuda hali sa LGU asin sa iba pang grupo alagad dapat kaipuhan an dugang na tabang huli ta dakul an mga naghahalat nganing makabangon an saindang pagbuhay orog na si mga nagabaan nin harong, sabi kan bise alcalde.