Respeto sa Magurang asin Gurang

KAN SARONG ALDAW nag lunad ako sa bus pasiring sa harong ni Nicol na dati kong kaklase sa Naga. Pano-pano nin pasahero si bus kaya naka tindog lang ako sa likod kan tsuper. Pagka tapos nin sarong minuto may tawong naka tukaw an nag senyas sa direksyon ko. Dae ko siya bisto kaya nag salingoy ako ta huna ko may ina-apod siya sa likod ko. Pero mayo man tawo sa likod ko.

“Sir, sir, please take my seat.” An sabi kan sarong joven na lalaki na nag tindog mientras naka tukdo sakuya nganing patukawon ako.

“Oh, thank you, thank you so much. God bless you but I’ll be going down in one stop.” Si pag Dios mabalos ko saiya asin pina tukaw ko siya otro sa tukawan niya.

Nag ulay kami nin mga duwang minuto asin pina-isi ko saiya na bihira na an mga magalang na tawo ngunian. Saro daa siyang Hapon. May kaibanan siya nin sarong puting Amerikana na nobya niya daa.

KASUBANGI, kan paluwas ako sa harong na may mga bitbit na mga pang recycle na basura, may nag agi asin nag rani sakuya na sarong aki pang babae.

“Mister, let me help you with that.” Gusto taka tabangan an sabi kan si babae na dae ko kaburu-bisto.

“Thank you and that’s very nice of you. But I can handle these.” Mabalos asin kaya ko na niako ini, si simbag ko.

Pero maski na sinabi ko na kaya ko na, binukasan niya pa para sakuya si basurahan kan mga recycle. Grabeng pag mabalos an sinabi ko na lang duman sa babae.

Pag laog ko sa harong hinapot ko tolos si agom ko.

“Ano gurang na ako pag hilingon? May gusto mag tabang sakuya ta garo naherak siya sa sarong gurang na may mga bitbit.” Si hapot asin sabi ko sa agom ko.

Nag para ngisi si Delia kan pig istorya ko saiya si eksperyensa ko sa bus asin duman sa babae. Hiniling ko si sadiri ko sa salamin asin medyo garo nag gugurang na an itsura ko maski na minsan iniisip ko na joven pa ako.

Pero maski na ngani may edad na ako nakaka ugma na naka abot ako sa arog kaining edad. An mga senyors dapat magpa salamat ta inabot ta an ngunian na panahon. Kadakul nangyayari ngunian na mayo man lang sa pangiturugan ta kaidtong mga aki pa kita.

Siring baga kan cell phone. Pano mo ma imahen na maski sa pag bayad sa mga tindahan pwede mo gamiton ini. Pwede ka pa mag apod maski sain sa kinaban. Kaidto sa Naga, kaipuhan ka pa mag duman sa Natelco sa Tabuco nganing maka apod ka lang sa Manila.

Pag abot man sa mga kawatan, maugma na satuya an mag pa layug nin buradol. Pag mati ko mangaralas an mga tawo ngunian kun istoryahan ta na kaidto kun mayong duros mag palayug nin buradol, ma taghoy ka lang asin mag kaka-duros na. Ngunian, mga “drone” na an mga pinapa layog. Dae na kaipuhan an duros.

An pag gurang sarong biyaya satuya kan Kagurangnan. Mayaman kita sa mga eksperyensya asin mga memoria. Dakul manunudan an mga jovenes sa mga matua asin mga gurang. Pero namumundo ako na nawawara na an respeto kan mga kaakian sa mga gurang nunian. Iba kan pag respeto kaidto kan mga aki sa mga magurang.

Kaya naugma akong marhay na may mga natatada pang mga jovenes na may respeto sa mga gurang siring kaining duwang nangyari sakuya kan mga naka aging aldaw. Respeto duman sa bus asin respeto kan si babaeng gusto mag tabang sakuya.

Pinapa ngadye ko na swertehun sa buhay an mga tawong arog sainda. Tawan man sinda nin halawig na buhay.

Tano ta nagsusurat ako manungod digdi? May mga kasuratan kaya sa Biblia na nagsasabi na kaipuhan tawan nin honor asin respeto an satuyang mga magurang nganing mag lawig asin magin marhay an buhay ta.

SEGUN SA MGA surbey o mga data, an Japan an may pinaka dakul na tawong lihis nin 100 na taon an edad. An nakaka ngalas ta mga aktibo pa asin mga marhay pa an mga salud kan mga tawong ini. Lihis sa 140,000 daa an mga may labing 100 na edad duman. May mga ibang nasyon man na may mga ciudadanong mga labing 100 pero bakong arog kan mga nasa Japan na makukusog pa.

An sabi sa surbey resulta daa ini kan klima asin sa mga kina kakan. Pero pag mati ko bako ini an solamenteng simbag digdi.

An Japan bantog sa kinaban na halankaw na marhay sa pag respeto asin pag asikaso sa mga magurang ninda. Kabali na digdi an saindang pag respeto sa mga matua ninda. Sa pag tubod ko iyo ini an pinaka rason kun tano ta haralawig asin marayrahay an buhay duman.

Exodus 20:12 “Honor your father and your mother, so that you may live long in the land the LORD your God is giving you.”